Entamu

Llamentable facer

  L\'Academia de la Llingua fexo ver, nel so día, que\'l proyeutu d\'escolarización del Sr. Conseyeru d\'Educación y Cultura pal cursu 1985-86 yera afayaízu, darréu que siendo progresivu y nun cayendo na fuexa del masimalismu, diba acordies cola nuesa realidá sociollingüística.

  De toes maneres, el Ministeriu d\'Educación y Ciencia, exerciendo una vegada más les sos irrenunciables zunes centraliegues, corta pela freba tolo que de valoratible s\'inxería nel citáu documentu.

  A les demandes asturianes respuende llarnentablemente asoleyando nueves trabes pa torgar el drechu que\'l neñu tien individualmente a deprender la so llingua. Foron les posiciones más reacionaries de dellos funcionarios asitiaos n\'Asturies, el sofitu d\'esi facer ministerial.

  L\'Alministración española opónse a que la escolarización se faiga na segunda estaya d\'EXB escontra la prática qu\'ella mesma fexo nos centros-pilotu nel cursu 84-85. De seguir les sos contrapropuestes obligaríase a los neños a ver la so llingua talmente comu si fora extranxera.

  Asturies, con esta política, queda dixebrada otra vegada más ente los demás pueblos viéndose obligada a pagar a lo que namái correspuende a los presupuestos xenerales del Estáu. Namái la mala xestión ye la responsable de que la escolarización grave económicamente al Principáu.

  La conformidá coles contrapropuestes del MBC, asoleyada pel Sr. Conseyeru de Cultura, ve llamentable al arrenunciar a lo que ye competencia esclusiva -según l\'Estatutu d\'Autonomía- del Principáu d\'Asturies.

  Ye obligación de l\'Academia facer llegar al Gobiernu Asturianu, el so esmolecimientu y encamenta-y qu\'arrespuenda comu-y correspuende a un gobiernu autónomu. Les palabres del Presidente, Sr. Silva, entá resuenen ente nós: «El que quiera deprender bable va poder facelo, el que quiera». Llastimosamente, de seguir la política de güei, nun
será reali,dá esa promesa enxamás.

                                                                                 Uviéu, 14 de Xunu de 1984



Los problemes del aire

  Hai dellos díes lleíamos daqué percurioso: nos aviones d\'lberia que se posaren en Ranón los viaxeros sentirien les normes de vuelu non sólo\'n castellán y n\'inglés sinón tamién n\'asturianu.

  L\'anuncia, oficialmente glayada, nun dexaba de ser «curiosa» y un niciu de que la paradoxa ye la xinta onde dellos se sofiten. Los viaxeros d\'lberia llegaríen a un país u oficialmente nun hui llingua nin carteles oficiales nesta llingua, nin tan siquiera los nomes de los llugares cola llingua respetada pero, eso si, oficialmente, la llingua yera viaxera pel aire, nun vuelu qu\'a daquién-y prestaría ensin torna.

  Esa foi l\'anéudota d\'estos díes que trexo palabres probes a dalguna pluma qu\'esnula namai na antoxana. Ná de raro que se glayara. El nzotivu foi l\'avión pero les causes yeren otres más terrenes.

  Unos díes enantes, nel mes de mayu, cuandu la bona sociedá s\'asoleyaba ente músiques y dances, el Teatru Filarmónica d\'Uviéu enllenábase, mui sele pero mui llenu, de neños y neñes qu\'a lo llargo l\'añu siguieren un cursu de llingua asturiana nos seis centros pilotu. Cuandu, al otru día, la bona sociedá espertaba col periódicu ente les manes atopábase con una primera plana mortificante. Los babayos y «paletos» de siempre -los del pueblu- festexaren, la xornada enantes, el Día de les Lletres Asturianes con éxitu ciertu. Y entás más, y asina s\'afita nos cartafueyos al usu d\'autoridaes, la esperiencia escolarizadora foi meritoria y ponderatible. Los rapacinos siguen siendo neños ensin perder oportunidaes nin sentise afogaos peles clases. Los padres taben percontentos por encontar una esperiencia de la que comu asturianos nun tienen por qué avergoñase. Los maestros mui allegres per un llabor imaxinativu y pedagóxicamente valoratible.

  Namái los qu\'anoxen la llingua afitada\'n suelu, tenien motivos d\'esmolición. Por eso falaron llueu de los problemes del aire.

 Compartir