Lletres Asturianes

Entamu

Ye raro

  Ye raro, sí, de mano, que nun país comu\'l nuesu onde xuxuriar lleva tiempu llargu, nin se sienta un burbús por aciu d\'unos premios qu\'ochobre llanza.

  Ye perestraño cuandu perdifícil ye, ente nós, apautase\'n cuasimente nada.

  Y raro ye, enforma más agora, llueu de cincu años, cuandu pa naide tarán tapecíos los enfotos d\'una fundación de nome «Principado de Asturias»: lloñe, perlloñe ta Asturies y la so cultura del so facer, magar se quixera entremecer too con borrina, abeyes y vaqueiros d\'alzada.

  Estraña, sí, la unanimidá de los partíos, tan miraos n\'otres caxigalines provincianes, y la de los de más calculáu facer otres vegaes.

  Estraña la presencia -nuna sociedá privada- d\'un Conseyu de Gobiernu con un presidente escaecíu -añu tres\' añu- en dalguna intervención falada.

  Estraña la lloa dafechu de los muérganos d\'opinión y pallabra. Sí, ye estraño too nun país u perdifícil ye dir acordies en nada.



Política llingüística

  El Gobiernu asturianu acaba facer, dientru la Conseyería d\'Educación y Cultura, una estaya de «Política Llingüística».

  Esti fechu consideráu namái en sí mesmu ye una bona anuncia, d\'un llau porque s\'entama un camín pel que l\'Academia rispiera; d\'otru porque la persona escoyida dio, abenayá, muestres favoratibles a la vindicación llingüística.

  De toes maneres la esperiencia faimos tamién perafitamos na idea de qu\'enxamás ye granible, de mano, enfotase\'n dellos xestos del poder darréu que, en delles ocasiones, inxérense nellos llastimoses realidaes tapecíes.

  Nun quixéramos qu\'esta vegada a esi caricox d\'esperanza lu matara un desencantu más nesi camín llaráu de demandes insatisfeches, de recelos, de promeses...

  Abrir una estaya de política llingüística lleva darréu una esixencia de coherencia al mesmu poder que la afita. Nun tendría xacíu facer propuestes dende una faza del Gobiernu (dende la Conseyería) y caltener toles reserves práutiques dende la gran mayoría de les conseyeríes del mesmu Gobiernu. Nun sería a entendese que se faigan iniciatives favoratibles a la llingua dende un departamentu y que c\'escaecieren nel que s\'asitia al llau.

  L\'Executivu asturianu nun podrá cayer na fuexa del control de la reivindicación de la llingua naguando per ralentizar un procesu fechu con más que sobraes poses. Torgar más entá la escolarización, magar les perfavoratibles demandes d\'esti cursu, nun ye d\'aconseyar pero nun s\'encarar dafechu colos problemes de la normalización social (muérganos de comunicación, toponimia, etc.) consideraráse niciu del ruin enfotu políticu que vien siendo\'l so compangu.

  La bona voluntá del Gobiernu, de toes maneres, verémosla darréu o nun la veremos: los presupuestos de l\'Academia serán niciu del enfotu llingüísticu o del enfotu por anubrir un muérganu independiente, gracies a una oficina controlada pel partíu hexemónicu.

  Una estaya de política llingüística ye daqué nuevo n\'Asturies y tien qu\'arresponder a les necesidaes específiques de la llingua d\'Asturies, mas atalantar que\'l casu asturianu ye únicu pue llevar a llamentables xuegos. Cuasimente nun hai un res qu\'inventar: namái fai falta acompasar otres esperiencies al nuesu ritmu porque la naturaleza de les coses ye la mesma y el respir pel llogru d\'una llingua asturiana, acordies colos cumales algamaos peles otres del Estáu, tamién.

 CompartirCorreoFacebookTwitter
Lletres Asturianes
Academia de la Llingua Asturiana
C/ L’Águila 10
33003 Uviéu
T. +34 985 211 837
alladixital.org
ISSN (versión dixital): 2174-9612
ISSN (versión impresa): 0212-0534
Depósitu Llegal: U-826/82
© Academia de la Llingua Asturiana