Entamu

¿Qué-y pasó al Grupu Popular?

  El 26 d\'avientu la Xunta Xeneral dixo non a una propuesta fecha pel «Grupu Popular» qu\'allampiaba por dexar a l\'Academia de la Llingua ensin presupuestu. Nidiamente impúnxose\'l bon aquel de socialistes y comunistes mentantu quedaba ente dolco y la media manta lo que propunxeren los «populares».

  De mano asoleyamos que foi pa nós la mayor de les sospreses y que nun aguardábamos daqué cosa que s\'asemeyara. L\'Academia, paezmos, non sólo cumple dafechu los sos estatutos iguaos cuandu toles fuerces s\'inxeríen nel muérganu preautonómicu, sinón que siempre tuviemos col citáu grupu les mesmes consideraciones que colos otros que s\'enxerten na Xunta Xeneral del Principáu. Más entá, estes fueyes abiertes tuvieron, y tán, a les sos collaboraciones comu perdemuestra la firma de dalgún de los sos militantes.

  Asina entenderáse que nun seyamos apescanciar por qué agora s\'escueye tan inxustificáu camín.

  Resúltamos perdifícil almitir qu\'esta tounida seya la descalificación del so presidente que cola presencia sofitó, en dalgún sentíu, los cursos de llingua asturiana nel setiembre llaniscu. El so facer daquella fexo ver, a quien entá nun tuviere lluces, que la nuesa llucha pela llingua diba empobinada percima postures y sentires partidistes. Poro, asitiase agora tan a la escontra nun diz col sentíu común del señor Rozada, ponderáu siempre.

  ¿Cómo pue, entós, xustificase esi proceder na Xunta Xeneral que corta pela freba la collaboración y el bon entendimientu?

  Esa respuesta, nidiamente, tendrá que se dar non sólo a l\'Academia sinón a los ciudadanos d\'Asturies porque nun se ye a camentar que l\'únicu responsable seya\'l pintorescu portavoz Casielles Aguadé, ruinamente prestixáu pela so xusteza verbal y probemente críticu coles sos insuficiencies intelectuales, informatives y argumentales.

  Entou casu si de la collecha presonal d\'esti personaxe se tratare nun hai que s\'escaecer de que falaba nel nome del citáu grupu y al grupu-y correspuenden dar una afayaíza contestación.

Un drechu torgáu

  De nueu l\'Autoridá que represnta al Estáu Español nel Principáu d\'Asturies empobina per un camín que va a la escontra, oxetivamente, de los drechos asturianos al nega-y la llegalización a la Xunta pola Defensa de la Llingua, afitándose namái nel fechu de dir en llingua asturiana la documentación presentada al efeutu.

  Nun-y fai falta a esta Academia traer a cuentu la bayura de datos onde s\'afita\'l drechu a la propia llingua porque, pelo visto, en poco se tien la declaración universal de los dreohos humanos.

  Pero al empar ye murnio ver el ruin casu que fai al espíritu de la Costitución d\'esi Estáu, l\'Autoridá que n\'Asturies lu representa.

  Namái-y queda comu argumentu sofitase nes llagunes del Estatutu d\'Autonomía pa dar una negativa al emplegu oficial de la llingua cuandu, que se sepa, esi curtiu Estatutu enxamás niega\'l drechu al so emplegu.

  De xuru que los nuesos razonamientos nun moverán esa voluntá política a la escontra de lo asturiano pero los encontos del representante del Gobienu español más ruinos son cuandu nun quieren pescanciar que la llingua asturiana yá ye una realidá na enseñanza y féxose presente\'l so emplegu nel mesmu Boletín Oficial del Principáu. Por si fora poco esto la mesma Xunta Electoral acetó oficialmente la llingua cuandu nes últimes eleciones dio por bona tola documentación d\'un partíu, presentada únicamente\'n llingua asturiana.

  De toes maneres más grave que nun tener esto presente ye qu\'esi delegáu del Gobiernu de Madrid escaezse llastimosamente de que foi él mesmu quien llegalizó hai unos años a la Xunta d\'Escritores Asturianos con una documentación dafechu n\'asturianu a la que namái s\'axuntaba una versión castellana ensin firmar.

  Ye posible que nueves órdenes de Madrid -represives de lo asturiano- tean en marcha; en tou casu, una vegada más les zunes centraliegues van a la escontra de la Hestoria y de los drechos de los pueblos.

  Asina, l\'Academia de la Llingua vese na necesidá de facer un llamamientu a la Xunta Xeneral y al mesmu Gobiernu del Principáu pa que la oficialidá de la llingua seya una realidá iguando l\'Estatutu d\'Autonomia y torgando les actitúes represores qu\'allumen siempre, afitándose nes sos llegalidaes, los que representen intereses contrarios al nuesu país.

  (Pautu de l\'Academia de la Llingua Asturiana na so xunta de 13 d\'avientu de 1985)

 Compartir