Entamu

Nun ye d\'aconseyar ¿acuéi?

  De magar naciere, esta Academia caltúvose na idea de nun s\'inxerir nes discusiones con presones que la entamaben escontra la llingua asturiana.

  Pa nós ta perafitao que ye posible\'l llogru de la so normalización social asina comu algamar que seya ferramienta amañosa pal trabayu lliterariu y comunicativu de tolos díes.

  Les nueses razones nun se dixebren pa ello de les qu\'almiten que son vidables les demás llingües minoritaries espardíes perdayuri.
 
  La ventaxa de nueso \'foi siempre que los contrarios a la llingua, encirrizaos nes sos llacerioses zunes, nin foron munchos en númberu nin intelixentes nos sos planteamientos. Llueu les sos llagunes informatives fexeron ver a la xente de bona voluntá y xuiciu que se contaben aventures ellí onde facia talta encontar con razones.

  De toes maneres, ye posible que\'l nuesu facer nun fora entendíu al dereches por delles presones que col mal conseyu del so oportunismu quixeron ver debilidá u namái se daba prudencia pela nuesa parte. Y ye posible qu\'eses presones, desengañaes d\'un procesu que nun dio pasu a les sos presonales ambiciones, camentando que\'l Gobiernu Asturianu pue dir alantre nel camín recuperador, quemen agora l\'últimu cartuchu naguando por torgar lo qu\'a estes altures yá-yos resulta imparable, la reconocencia dafechu de la llingua na sociedá asturiana.
 
  Ye claro que tán nel so drechu a entender les coses comuyos preste y asina tapecer les sos presonales frustraciones y doméstiques velees coles meyores xides qu\'escurran. Mas abúltamos que ye un retortoriu enllenu d\'arribayeros el camín escoyíu porque son elles, les presones de más hestoria, les más necesitaes de prud,encia nel so pacetible vivir. Son elles les que tienen que persaber que siempre val más nun aballar les nates que puen enllordiar les agües. El baturizu y la griesca enxamás dan lloréu nin dineru; poro, nun son d\'aconseyar ¿acuéi?

 Compartir