Entamu

  El 30 d\'avientu fai cincu años l\'Estatutu d\'Autonomía .que reconocía un país, con unes llendes, con bandera, escudu, himnu, muérganos d\'autogobiernu, llingua ...

  Yera un país que tenía cuasimente de too pa ser un bon y gran país anque llueu la fosca realidá, tantes vegaes focicona, venía fayendo d\'un vieyu reinu un nueu principáu, d\'una bandera un entrernez de banderes segundones... d\'una llingua hestórica una reconocencia llastimosa.

  Perpesaba aquella llábana que torgare nel Parllamentu español la redacción fecha n\'Asturies. Lo qu\'equí yera «llingua específica» ellí quedó desaniciao por una UCD secursalista hasta nel so morrer.

  Llogróse, de toes maneres, asitiar un artículu 4 positivu daquella porque dio seguranza onde nada llegal sofitaba. Mas viose llueu qu\'aquel vestíu nun taba fechu a la nuesa medida o, si dalguna vez tuviere, quedare yá percurtiu al medrar la nación.

  Emplegóse de contino\'l so artículu escontra una escolarización dafechu, escontra la recuperación de los nomes de llugar, escontra l\'usu llexítimu nes rellaciones cola Alministración... El recursu a la tolerancia, a mirar percima la lletra ensucha, nun foi granible nes manes d\'unos funcionarios y políticos enchipaos d\'uniformismu español, peratentos a nun se sabe qué esencies amenazaes.

  Camentar que nel futuru aguarda un meyor tratu de quien nun pescancia les finures del respetu nun paez xuicioso. Al que namái entiende la llegalidá lliteral, lletres de llegalidá afitada convién empobinar. Poro, nestes circustancies de güei nun queda otra xida qu\'una igua del Estatutu d\'Autonomía onde la oficialidá de la llingua seya\'l finxu de referencia.

  La oficialidá, al nuesu entender, nun requier que darréu tola alministración del Principáu se faiga billingüe. Esi llogru fairáse adulces, ensin prieses, ensin traumes, ensin masimalismos. Polo que nesti momentu se nagua ye polo qu\'agora pue respise:

   1. Reconocencia llegal de que l\'asturianu ye llingua oficial d\'Asturies.
  2. Fixación d\'un plazu (¿14 años?) pa que la llingua algame tol cuma\'l d\'un billingüismu valoratible.
  3. Asoleyamientu de los pasos intermedios que van dase enantes de llograr el billingüismu dafechu.

  Los qu\'agora aconseyen aguardar, darréu que na so opinión entá ye ceu pal so algame, deberíen pensar fondamente que los sos razonamientos van siempre retrasaos porque foron les mesmes presones que se negaron a faer un «decretu de billingüismu» (daquella nun s\'allampiaba por otra cosa) que dexare a les clares la siempre cimblante interpretación del artículu 4.

  Pero agora yá ye otru tiempu y la esperiencia aconseya una reconocencia dafechu que ponga a la llingua Ilegalmente, a l\'altura qu\'esixe la mesma Costitución española y los drechos humanos.

 Compartir