Lletres Asturianes

Entamu

Filoloxía Asturiana

  El 29 de mayu la Xunta de la Facultá de Filoloxía apautábase pa qu\'entarnaren les dilixencies qu\'empobinaren al llogru de la especialidá de Filoloxía Asturiana. Yera ésta la segunda vegada que la mesma Xunta asoleyaba\'l so acuerdu favoratible al astunanu darréu qu\'unos meses enantes aprobare ufiertar \"Llingua Asturiana\" comu materia optativa nos cursos comunes del nueu Plan dlEstudios.

  L\'anuncia, nella mesma, ye perpositiva y fai ver cómu, pasu ente pasu, los sectores más xóvenes, menos prexuiciosos y con más tastu astunanu van siendo mayoritariamente favoratibles al idioma.

  La nuesa vieya idea de que la xente nun refuga enxamás un conteníu astunanu si vien xuiciosamente encontáu, perafítase otra vuelta y tien d\'aguiyar, necesariamente, a los que col so mieu o galbana viven enartaos ensin tomar les midíes necesaries de normalidá cultural.


Compromisos pedíos

  Dicimos esto porque equí yá va siendo hora de llevar alantre compromisos pedíos bonalmente pola xente ensin l\'aplagoriu de les manifestaciones caleyeres. Esi pedimientu sele, cuasimente silenciosu, pervese tolos dies cola bona acoyida a la exolarización de la llingua, ellí onde s\'ufierta, y cola opinión pública perfavotatible al idioma más allá del 70%. Si la demanda pública nun ye abondo enta, yá se mos dirá ú ta\'l camín que coyer dientru la racionalidá ciudadana.



Nun valen coartaes

  Porque lloñe d\'esa racionalidá quixeren llevamos dalgunos iluminaos de Meya escuela que, perdiendo toles batalles n\'Asturies, suañen con imponer la so intransixencia antiasturiana sofitándose en firmes arrecoyíes nes aules ultramontanes de dellos universitarios españoles.

  A lo meyor ye ésa la coartada que quixeren tener equí los más inmovilistes, los que desprecien les regles más elementales del xuegu democráticu de convivencia. Esboroñaos los vieyos ídolos d\'un Alarcos ensin norte, que niega la propia firma y pallabres, nun-yos quedará otra salida que l\'arbitrariedá. Pero ési será\'l so problema y el de los que, a la escontra de tou sanu xuiciu, nagüen, irresponsables, por volver el llombu a la realidá que, adulces pero sollerte, amuesa\'l camín d\'un compromisu con Asturies, cola so cultura, cola co llingua.

 CompartirCorreoFacebookTwitter
Lletres Asturianes
Academia de la Llingua Asturiana
C/ L’Águila 10
33003 Uviéu
T. +34 985 211 837
alladixital.org
ISSN (versión dixital): 2174-9612
ISSN (versión impresa): 0212-0534
Depósitu Llegal: U-826/82
© Academia de la Llingua Asturiana