Lletres Asturianes

Entamu

Un pautu dignu na enseñanza

  L\'entamu del nueu cursu escolar punxo enriba la mesa parte de los problemes y contradicciones nos que s\'inxere la escolarización de la llingua na EXB y nes Enseñances Medies. Una bona actuación de los sindicatos torgó que se llevaren alantre los planes que l\'Alministración texía pa desaniciar cuasimente nun 50% la llingua de la enseñanza. Les promeses que fexere acuantayá l\'Alministración autonómica nel sen de desendolcar les posibilidaes inxertes nel Estatutu d\'Autonomía y de dir doblando, añalmente, el númberu d\'escolares que recibieren clases de llingua asturiana queríen agora baltiase cola xida de los munchos problemes de financiación con que s\'alcuentren los siempre curtios presupuestos educativos.

  Pero esti facer, de xuru, nun ye\'l más amañosu pa que les instituciones algamen el creitu que tanto necesiten a los güeyos de munchos cada vegada más sollertes a les pallabres y promeses non cumplíes.

  La falta de diálogu y el nun s\'encarar, con toles consecuencies, a los problemes de la llingua y a la so reconocencia en toles estayes sociales, lleva a lluches y enfrentamientos que resultaríen ensin xacíu si la responsabilidá s\'asitiare. Pela parte de nueso ye irrenunciable defender la dignidá de la llingua —que ye tamién la dignidá del pueblu— que, polo qu\'a la enseñanza se refier, habría inxertase darréu nun pautu ente\'l Gobiernu del Principáu y el Gobiernu del Estáu que recoyere comu finxos fonderos:
 
  1. La xeneralización del asturianu comu asignatura que s\'ufierta en tolos centros escolares y a tolos rapazos n\'edá escolar.
  2. La ufierta de la materia de llingua asturiana dientru l\'horariu escolar ensin interferencia posible con otres materies.
  3. De la presencia de la llingua asturiana, comu materia que s\'inxere dientru del curriculum escolar, queda constancia nel llibru d\'escolaridá.
  4. El «Conseyu escolar» queda lliberáu de tou tipu de responsabilidá decisoria que cinque la presencia del asturianu nos centros escolares.

 CompartirCorreoFacebookTwitter
Lletres Asturianes
Academia de la Llingua Asturiana
C/ L’Águila 10
33003 Uviéu
T. +34 985 211 837
alladixital.org
ISSN (versión dixital): 2174-9612
ISSN (versión impresa): 0212-0534
Depósitu Llegal: U-826/82
© Academia de la Llingua Asturiana