Entamu

  A lo llargo d\'estos años de trabayu pol afitamientu de la llingua, la esperiencia fíxomos ver les diferentes sendes peles que facía falta andar y los métodos dixebraos de llucha y de convencimientu que debíen emplegase. El resultáu, si bien ye verdá que non siempre s\'algamó\'l cumal pol que se naguaba, en llinies xenerales ye mui favoratible y ufierta, comu contrapuntu a nueves y posibles víes, la conocencia d\'un terrenu llargamente triáu.

  Pero una de les enseñances más fondes que de too ello surde ye que\'l trabayu resulta más prestosu y granible cuandu iniciatives al marxe de la programación son llevaes alantre por xente que nun se conocía nin de la que se tenía anuncia. En sen contrariu tamién ta\'l marguxu tastu que se sigue al pescanciar cómu la conducta insolidaria y entreguista puede asitiase ente los que, llogrando determinaes metes sociales, arrenuncien a una llucha y desmovilicen a los curtiamente atentos, o bonalmente inxenuos, y torguen el necesariu trabayu n\'andecha, pernecesitáu d\'encontos y de la imaxinación y manes de los toos.

  La hestoria d\'estos venti años ye una hestoria perguapa, sí, pero también ye la hestoria de los que foron fayéndose mayores, de los que llograron inxerise en puestos meyores, de los que pudieron tomar iniciatives interesantes pero tamién la de los que, desgraciadamente, escaecieron que teníen que facer aquelles coses qu\'apocayá esixíen a los que s\'asitiaben nes estayes en qu\'agora ellos mesmos s\'alluguen.

 Compartir