Entamu

La llingua na Universidá

  Fai dellos años, cuandu se falaba d\'inxerir la llingua nos centros escolares, dicíen de pallabra aquellos que paecíen más posaos: «Sí, pero llibremente».

  Pero cuandu l\'arrechu valir de los fechos fexo ver que la «llibertá» nun diba a la escontra de la llingua sinón que los porcentaxes de neños qu\'escoyíen esa materia yeren peraltos, hubo que camudar l\'argumentu cenciellamente pente medies de torgues burocrátiques qu\'amenorgaren el procesu de recuperación.

  Tamién daquella, cuandu se falaba del «hable», toos o cuasimente toos, mesmamente los más xabaces, facíen proclames del so amor y, remedando lo qu\'unamuno dixere pal vascu, falaben de la conveniencia d\'embalsamalu en ciencia y dexalu morrer.

  Pero cuandu los testerones fechos dan anuncia de qu\'entá ye ceu pa falar de muerte y na Facultá de Filoloxía ríspese por ufiertar la llingua d\'Asturies comu especialidá, de nueu les estructures burocrátiques, agora universitaries, lluchen por frayar toa posibilidá d\'anovamientu cultural asturianu.

  Sedría difícil, en tou casu, escaecer que xente non asturiano qu\'agora, baxo un rector non asturianu (Gascón), s\'opón perdafechu a la llingua na Universidá, apadrinó, hai dellos años namás, baxo otru rector non asturianu (López Arranz), unes xornaes («La lengua y sus variedades») que nel so enfotu significaríen arrequexar pa siempre la dignificación de la llingua d\'Asturies

  Dello d\'esa xente, ideolóxicamente estremoso, culturalmente ermo y socialmente ambicioso, nin s\'esmolez poles sos actuaciones nin algama les consecuencies llacerioses que pa la institución universitaria puen xenerase. Incapaz de tastar el valir de les materies humanístiques nada fadría que pescancie lo que ye un conceutu dinámicu de la cultura.

Pero n\'otru sen un nueu talante nel Gobiernu d\'Asturies (el mesmu que bien llueu contará ente les sos tresferencies cola mesma Universidá) podría facer reflesionar a los más xuiciosos d\'ente los allugaos nel entremez universitariu. La implantación del asturianu sedrá posible si al Gobiernu d\'Asturies-y paez aconseyable. A la necesidá social y a la conveniencia científica podría axuntase agora la suxerencia 0\'1 pautu políticu. Los tiempos que cuerren fadrán apostar pola razón siempre del llau de los que, en casos de crisis, lluchen poles posibilidaes del propiu país.

 Compartir