Entamu

Gobiernu y Oficialidá

  Acabante pasar les eleiciones y fecha la Xunta Xeneral del Principáu, el gobiernu que surda tendrá que s\'encarar dafechu coles midíes qu\'empobinen a un meyor tratamientu de la llingua asturiana. .A lo llargo de la campaña electoral toos, d\'una trazao d\'otra, asitiáronse de mou favoratible al cumplimientu del artículu 4 del Estatutu d\'Autonomía y agora entama\'l tiempu en que toos, dende\'l gobiernu o dende la oposición, tendrán que trabayar pa que\'l futuru de la llingua nun s\'amaliñe por postures escapistes.

  Ye\'l momentu de facer vidable esi artículu 4 tan arrequexáu polos que, falando de la diversidá dialectal, escaecen que\'l mesmu testu llegal afita la posibilidá unitaria del idioma. Y ye la hora, comu primer niciu favoratibe de la llexislatura, d\'encontar d\'una vez por toes la escolarización xeneralizándola nes escueles, colexos y centros d\'enseñanza d\'Asturies comu ufierta que namái la voluntá a la escontra delos padres pueda torgar.

  Nun se ye a entender qu\'entá ente delles fuerces polítiques s\'allugue dalguna llercia que nun dexa andar llibremente pel camín de la normalidá llingüística. Si la Universidá d\' Uviéu quixere ufrir la so esperiencia nesi sen, de xuru que cuntaríen los sos xestores actuales que\'l llogru de la especialidá de Filoloxía Asturiana nun ye niciu de males sinón fonte de meyor entendimientu. Nesa intelixencia hai que tar porque\'l mesmu día 2 de xunu otra vuelta la mesma Universidá, la so xunta de gobiernu, nun bon xestu apautóse pa que l\'asturianu s\'ufiertare comu asignatura \"troncal\" na Facultá de Filoloxía.

 Compartir