Entamu

Les imprudencies verbales del Sr. Rozada

  De magar el so entamu l\'Academia vien enfotándose en facer un llabor, non fácil, d\'axuntar na recuperación llingüistica a toles fuerces polítiques y sociales asitiaes nel país. Ello nun ye xera fácil porque les circunstancies obliguen dacuandu, si otres voces nun reclamen, a da-y puxu al cometiu tutelar inxertu nos mesmos estatutos académicos.

  Nos nuesos curtios años d\'hestoria fexemos critiques, a vegaes mal entendíes, a los que facíen la política cultural y, a vegaes, viémonos na obligación de dalo a conocencia pública. De toes maneres, siempre foi\'l nuesu calter falar y falar, una vuelta y otra, colos representantes de les fuerces politiques más caracterizaes y que s\'avinieren a ello bonablemente.

  El Partíu Popular foi ún de los que, a lo llargo d\'estos años, non sólo acoyó\'l nuesu respetuosu tratu sinón que ye testigu de la nuesa voluntá d\'esconxurar los males qu\'amagaben na reivindicación llingüística. El so cabezaleru, Isidro Femández Rozada, encontará les nueses pallabres comu avezáu interlocutor de nueso. Nel entós so curtiu andar pela vía democrática pudiemos ver un intentu d\'averamientu, prudente y valiente al empar, cuandu pelos ochenta
pesllaba en Llanes los nuesos cursos pa enseñantes llamentando qu\'él tamién recibiere nes propies carnes la represión de la fala.

  Pasáu un tiempu en que los sos intereses paecíen asemeyaos a los de dellos prohomes del provincianismu militante, que nin yeren los sos amigos nin los del \"bable\", entrábase con declaraciones llastimoses, impropies de quien por cuenta del cargu representativu habría tar avezáu a cunar les pallabres, peñerando, si falta fai, la reacción primera, sangrina, ensin xacíu y comprometedora.
 
  Hai unos díes, por exernplu, declaraba a un periódicu d\'Uviéu daqué que, nel so sanu xuiciu, naide sedría a enunciar: \"De lo que sí estoy convencido es que proteger, defender y difundir los bables, es una riqueza por la que siempre lucharé. Pero no se puede normalizar algo que no existe\". Pero entá más, siguiendo darréu cola so particular lóxica, interpreta asina la política llingüística del so correlixionariu y n\'otra domina xefe de files, Manuel Fraga Ibarne: \"La Xunta [gallega] hace lo mismo que el PP en Asturias: proteger un habla tradicional. Manuel Fraga es conocedor de que fuera de Galicia hay muchos gallegos que tienen interés en mantener la protección de su lengua, por eso la defiende\".

  Fai dellos años confesaba Isidro Femández Rozada que\'l so enfotu nun yera\'l nuesu, cosa a toes lluces evidente; pero sofitaba les sos razones de convivencia pacífica cola reivindicación llingüística a razón práctica de que nun diba ser la imprudecia d\'unes declaraciones desafortunaes la responsable de que se-y escabullere un solu votu asturianu. A lo meyor escaeció les sos pallabres o perdió nos sos viaxes al Senáu de Madrid la perspectiva de lo inmediatamente práctico. En tou casu bien taría que nel PP, los que si tienen claro que la defensa de la llingua asturina tamién diz con ellos, fexeren sentir que con faladuríes tan mal afilvanaes, a la llarga nun se pue dir lloñe.

                                                                              *****

Nel 100 cabudañu de Teodoro Cuesta

  El primeru de febreru de 1895 morría n\'Uviéu quiciabes el que foi l\'escritor asturianu más conocíu nel so tiempu y el que diere a la Lluz una de les collaboraciones lliteraries más llargues na llingua del país. Falando de la so muerte afita Constantino Suárez que foi un duelu verdaderu en toa Asturies y nes colonies asturianes asitiaes fuera.

  La figura de Teodoro Cuesta con esa reconocencia veneral, y con delles iniciatives llevaes darréu pal meyor espardimientu de la so obra, ye posible que nun tenga entá, nos nuesos díes, la consideranza pública que merez nin la edición crítica de dellos de los sos escritos, nin siquiera la xuntura de oulos que salieren de les sos manes. Queda trabayu de recoyida de datos ensin facer y de xuru qu\'habría llograse col esfuerzu una valoración xeneral. Nel so 100 cabudañu resultaría mañoso que se fexere esi llabor comu\'l meyor homenax, ensin escaecer la posibilidá d\'otres iniciatives siempre razonablemente aconseyables.

 Compartir