Lletres Asturianes

Entamu

Más dineru, menos escueles

  L\'entamu\'l cursu tréxomos, otra vuelta, los milenta problemes a los que tamos avezaos anque esti añu grandemente allargaos por cuenta les midíes qu\'acompanguen la implantación de la ESO. Polo qu\'a la llingua asturiana se refier paez que surden nuevos problemes al nun se facer casu de les nueves demandes de los centros y pola curtia atención que se tien col profesoráu que, habiendo reprimise en dixebraos centros, difícilmente va facer un bon llabor pedagóxicu.

  Pero, quiciabes, lo más llastimosamente grave son les nueves disposiciones llegales que torguen, de fechu, un desendolque normal de la llingua na segunda enseñanza, cortando pela freba, asina, los esfuerzos fechos na primaria. Facer que la única salida amañosa seya ufiertar \"llingua asturiana\" en contraposición y a la tema con otres disciplines comu \"francés\" fan pescanciar hasta qué puntu se ta desenfocando\'l sentíu que tien que tener la escolarización de la llingua y hasta qué puntu se ta lloñe de facer les coses al dereches.

  Pero mentantu pasen estes pergraves coses hai, pelo que dicen, bones cantidaes de dineru pa otres iniciatives. Ensin que lo uno tenga que dir a la escontra de lo otro. habrá que traer a cuentu, otra vegada más, que\'l camín afayadizu obliga a que, si hai bayura de dineru, que se reparta xustamente ente les munches iniciatives y necesidaes; si. comu canientamos y ternemos, fai falta dar prioridaes ye claro que l\'inxerimientu y xeneralización de la enseñanza tien que s\'asitiar nel primer llugar y nel cimeru, mesmamente contratando profesoráu dende la Conseyería de Cultura, acordies coles previsiones llegales. Ye\'l Principáu d\'Asturies, y bien ta nun lo escaecer, quien, según afita l\'Estatutu d\'Autonomnía, cuenta con toles competencies na enseñanza de la llingua asturiana y, darréu d\'ello, ha ser el responsable de que se faiga realidá la demanda d\'atender les necesidaes que se xeneren.

 CompartirCorreoFacebookTwitter
Lletres Asturianes
Academia de la Llingua Asturiana
C/ L’Águila 10
33003 Uviéu
T. +34 985 211 837
alladixital.org
ISSN (versión dixital): 2174-9612
ISSN (versión impresa): 0212-0534
Depósitu Llegal: U-826/82
© Academia de la Llingua Asturiana