Entamu

¿Un Estatutu coxu?

  Al entamu del branu entraba nes Cortes de Madrid el testu de lo que la Xunta Xeneral del Principáu proponía como nueu Estatutu d’Autonomía. De toes maneres, a la escontra de dalgunes previsiones, esa entrada nun se facía con tolos honores sinón cola crítica asoleyada poles minoríes vasca y catalana, asina como polos grupos parllamentarios d’Izquierda Xunida y de Nueva Izquierda.

  Nun podía ser menos en bona lóxica democrática porque’l testu empobináu dende Asturies, xustamente poles sos insuficiencies y carencies, nun llograre’l pautu de toles fuerces asitiaes na Xunta Xeneral.

  El puntu de más fonda dixebra ente los partíos centrábase nel tratu que-yos merecía la llingua del país. Mentanto qu’Izquierda Xunida y Partíu Asturianista afitaben el llogru de la cooficialidá de los idiomes asturianu y castellán, el Partíu Popular y el Partíu Socialista axuntábense na más intransixente de les postures negándose, ensin matices, a tou tipu de reconocencia presente y futura: encerrizase a la escontra de toa diverxencia, de xuru ha pasar como paradigma d’un facer impropiu d’una sociedá democrática y como ceguera grave en quien tien como función de so entender los movimientos sociales. Quiciabes por ello ye polo que s’entiende perdafechu la conducta de les fuerces minoritaries na Cámara de Madrid y, quiciabes por esa conducta, inesperada pa les fuerces centralistes, llogren pescanciase les llamaes dende’l gobiernu del Estáu a un nueu entendimientu.

  Pero esi entendimientu, camentamos nós, nun puede tener xacíu si se fai a la escontra de la reconocencia del idioma y del so llibre usu. Poco s’algamaría, anque tenga los votos necesarios, si l’Estatutu naz coxu y alloñáu del rispir de munchos ciudadanos. Pelo demás, nós, los ciudadanos, nun merecemos ser víctimes, tampoco nesti puntu, nin de les imprevisiones llegales nin de les voluntaes polítiques más torgaes.

 Compartir