La oficialidá de la mayoría
El xueves 12 del mes de payares el Congresu de Madrid decidía empobinar al Senáu, según ye vezu, el nueu testu del Estatutu d’Autonomía d’Asturies pautáu ente’l PSOE y PP. Dende’l puntu de vista llingüísticu esti testu nun supón dengún avance con rellación al que güei tien puxu.
De toes maneres, de magar el mes de setiembre, Izquierda Xunida y el PP caltuvieron delles conversaciones y llograben una nueva redacción. Según les nueses anuncies estos dos partíos axuntábense nun testu d’esti calter: El asturiano, lengua propia y patrimonio cultural de Asturias, goza de especial protección y fomento. Se garantiza su uso dentro de las administraciones públicas y en los medios de comunicación, así como la adecuación de la toponimia ensus formas tradicionales. Se garantiza su enseñanza en todos los niveles educativos y los derechos lingüísticos de los hablantes. Todo ello en la forma en que establezca una ley del Principado. El asturiano, lengua propia de la Comunidá Autónoma, goza de oficialidad en los términos previstos por una ley del Principado aprobada por una mayoría de tres quintos de los miembros de la Junta General.
El fechu de que’l PP punxere como condición pa votar al so favor que tamién el PSOE acoyere esta enmienda esplica que llueu, dada la oposición zarrada de los socialistes, nun prosperare la iniciativa qu’Izquierda Xunida defendía. Nesti momentu dizse que ye de prever (si nun camuden les feches electorales) que pa febreru podría pautase l’Estatutu nel Senáu pa, darréu, volver al Congresu.
Dispónse, entós, d’un curtiu tiempu pa facer lo imposible porque’l bon razonar s’asitie ente los dirixentes del PSOE, l’únicu partíu responsable güei de negar a Asturies la posibilidá democrática d’algamar la oficialidá del idioma. Ye tamién el tiempu de facer ver al PP que’l pasu dau en setiembre sedrá coherente y valoratible dafechu si nel Senáu, onde caltién la mayoría, fai propia col so votu la propuesta d’Izquierda Xunida cola que ta d’acuerdu. La suma de fuerces n’Asturies amuesa claramente una mayoría del llau de la oficialidá. Nun pue ser el minoritariu PSOE quien, ensin razones, incomprensiblemente, pieslle, él solu y porque sí, la puerta a una llingua que cuerre tolos peligros de desanicie si nun s’enconta con una reconocencia llegal a tolos efeutos.