Entamu

El pautu cola Universidá

  El miércoles 3 de febreru, el Rector de la Universidá d\'Uviéu y el Presidente de l\'Academia de la Llingua Asturiana roblaben un pautu de collaboración pel que l\'Acadernia pue inxerir, na so ufierta añal, cursos d\'Estensión Universitaria. Esti fechu supón, ensin dubia, que la Universidá tien una bona conocencia de la seriedá nel trabayu y nel facer llingüísticu y cultural desendolcáu pola Academia a lo llargo los munchos años d\'esperiencia docente. Pela so parte l\'Academia da un reblagu nel enfotu d\'algamar les estayes más dinámiques de la sociedá a les que, asina, llogra inxertar nes sos esmoliciones y aliendos. Los alumnos de la Universidá sedrán, d\'esa miente, los beneficiaos d\'una política cultural que non sólo mira pol llogru de los sos creitos de llibre configuración sinón por una formación afayadiza onde presentar lo asturiano col xuiciu que les coses esixen y col puxu del entusiasmu de los más.

  El pautu de collaboración ye una bona anuncia que, de toes maneres, llingüísticamente ha coronase colo que ye un naguar llargamente afalagáu non sólo na Universidá sinón n\'amplies faces sociales: la reconocencia de la llicenciatura de Filoloxía Asturiana por parte del Gobiernu español. Esa llicenciatura, pidida pola Facultá de Filoloxía, torgada por antidemócrates reconocíos, necesita l\'encontu fonderu del mesmu Rector p\'asitiar una parte perimportante d\'Asturies dientro de la propia Universidá.

                                                                                *****

Homenaxe a la llingua asturiana

  La última selmana de xineru, baxo\'l títulu Homenaxe a la llingua asturiana, presentóse nel Campus d\'Humanidaes una gran muestra de tolo que güei ye\'l llabor editorial del llibru y discu asturianu. Amás de l\'Academia trabayaron nello otres nueve firmes interesaes en llograr un espaciu dignu pa esti tipu de productos pernecesarios pal futuru del idioma. Nuna sociedá moderna naide xuiciosamente pondría en dulda que fai falta mirar por esa estaya onde la llingua s\'entrena perdafechu pa facer vidable l\'estándar y pa llevar a los ciudadanos tou tipu d\'esmolimientu y procuru.

  Ye verdá tamién que, cola prestosa ufierta que s\'amosaba a los munchos estudiantes y profesores que diben averándose a los destremaos mostradores, surdía l\'aconseyable reflexón so lo qu\'habría ser prioritario y sobre lo que debería asitiase nun segundu llugar nuna política d\'inversión cultural. Tamién se falaba de la necesidá de controlar precios (y más entá si tamos énte una lliteratura necesariamente encontada na subvención) y calidaes. Naide duldaba, per otru llau, de lo afayadizo y democráticamente obligao que sedría un llexítimu siguimientu de posibles humanes intemperancies. Pero\'l fechu de que d\'esto se parllare nun tapecía l\'interés de toos nin anubría un fechu incontestable: la llingua asturiana ta ehí al traviés de los sos testos; la llingua asturiana ye una erbía que, anmañosamente remanada, pue dar un calter cultural
de gran fondura a esti país.

 Compartir