Entamu

Una televisión afitada n’Asturies

  A xulgar peles pallabres autorizaes que de magar un tiempu van dexándose sentir, talmente paez qu’al nueu gobiernu ta pruyéndo-y llograr una televisión asturiana. La idea nun ye nueva ente nós onde abenayá que se vien rispiendo polo que, perdayuri, otros fexeron y acoyeron ensin problema nin reparu. Si la novedá relluma agora ye porque paez que respuende al enfotu y aliendu del mesmu presidente del Principáu.

  Algamar un muérganu de televisión propiu nun país como’l nuesu, siempre albentestate y alloñáu de tolos calces de la comunicación moderna, nun dexa de ser una bona anuncia onde’l calter prácticu enllaza, de xuru, col simbolismu inxertu nun actu que tresapasa la llaceriosa dependencia.

  De toes maneres bien ta aponderar que non por llograr un muérganu d’espresión se sofita dafechu nin la calidá de la información nin el prestixu del país. Nel nuesu casu la televisión por sí sola tampoco nun enconta’l tratamientu llingüísticu y cultural qu’a Asturies-y fai falta. Porque ta claro que, ente nós, pue facese, ensin munchu tirguir, una televisión más afayadiza, más plural y meyor xestionada que la qu’ufierten les centrales madrileñes y non por ello responder prestosamente a les razonables necesidaes y demandes asturianes. Da mieu, por exemplu, qu’esa televisión asturiana siga teniendo como fonte d’información cultural lo que s’entremez y mal tex nes llurigues madrilanes, al marxen d’otru alitar y d’otru sentir xeneráu nesta tierra. Y cuérrese’l peligru d’escaecer que la televisión del país asturianu non solo habrá respetar l’idioma sinón facer d’él ferramienta activa de la so recuperación y del so emplegu habitual na comunicación de tolos díes y non reclamu pal arcaísmu del molín, del cabanón de teitu o del llamentablemente inatendíu xuegu de los bolos.

  Una televisión asturiana, con toa seguranza, podrá deprender permuncho apruciendo a la d’otres comunidaes con llarga esperiencia, non pa reproducir les zunes llastimoses del clientelismu y poca lluz de dellos, sinón p’afondar na idea d’amor a la propia tierra y a la propia llingua.

 Compartir