Entamu

Xeneralización de la enseñanza

  Col nueu añu, el Principáu d\'Asturies llogra ún de los finxos polos que toa autonomía política debía naguar, nueves tresferencies. Nel casu presente Asturies algama, dafechu, el control de la enseñanza, llueu de qu\'años enantes la Universidá yá s\'inxertare alministrativamente nel Principáu.

  El llogru de les tresferencies educatives ye, ensin dubia, ún de los aliendos que los docentes afalagaben como niciu de les reformes necesaries qu\'una alministración averada a los ciudadanos nun podría nin escaecer nin allargar. Ábrese, asina, un tiempu pal enfotu y pa facer realidá lo que de promeses se fexere de magar s\'entamó a falar del trespasu na educación.

  Nesti contestu too fai pescanciar que\'l camín d\'inxertar perdafechu la llingua na enseñanza, alloñaos de duldes y d\'indecisiones, ta abiertu. N\'efeutu, afitaos pola marcación Ilegal, encontaos pola bona acoyida social, acompangaos por un profesoráu afayadizu (anque necesite dalguna actualización), apiruchaos pol necesariu presupuestu, curtios problemes tendrán los nuevos alministradores pa facer vidable una xeneralización de la enseñanza de la llingua ufiertada xenerosamente a tolos centros, a tolos niveles y a tolos neños. La mesma anuncia de que van averase al procesu los centros privaos tien un altu valir simbólicu y la so bona execución sedrá un termómetru que dea la midida de la sinceridá del proyeutu.

  Les perspeutives delliniaes peles declaraciones feches acabante llograr les tresferencies abulten d\'interés. Fadrá falta que nun quede too ente too ente dolcu y la media manta y que se faigan les previsiones amañoses pa inxerir un profesoráu, tantes vegaes castigáu pol escaezu, na xeneralización del idioma lo que, de xuru, ye del más fondu interés pal futuru educativu asturianu.

 Compartir