En 2010, cola publicación del númberu 103, Lletres Asturianes zarró la primera y mui importante parte de la so trayeutoria. y fízólo de la meyor manera posible cola estrena de la serie «anexos» y col asoleyamientu del primeru d’ellos, el dedicáu al Homenaxe al Profesor García Arias, que fore, ente otres munches coses, l’empobinador y primer direutor de la revista.
A lo llargo de toos estos años, de magar se publicare’l númberu 1 en 1982, Lletres Asturianes aportó puntualmente a los llectores y enfotóse en ser el referente más importante de la filoloxía asturiana nel sen más ampliu que se puea dar al términu filoloxía, rispiendo siempres pol rigor científicu. al empar, y per ente medies de les seiciones que s’inxertaben a lo cabero de cada númberu, Lletres Asturianes daba cuenta de xeres, fechos, noticies, anuncies de publicaciones, reseñes y de too aquello que cincaba direutamente al facer llingüísticu.
Arriendes d’ello, nel «Entamu» col qu’emprimaba, l’academia fixaba’l so pensamientu, la so postura en rellación cola dignificación de la llingua asturiana, colos drechos llingüísticos de los asturianos y asturianes d’esti país, coles polítiques llingüístiques de los socesivos gobiernos. y too ello, una y otra vegada, defendiendo la so llibertá d’espresión, con independencia del poder políticu y ayena de mou consciente a cuantes presiones se quixeron exercer sobro ella dende ámbitos estremaos; exerciciu de llibertá y coherencia col mandáu estatutariu de so y al que l’academia nun renunciará enxamás, por más que dacuando comportamientu talu llevare apareyao más d’un problema.
L’enfotu calteníu de que Lletres Asturianes fore una revista científica, valoratible y de referencia, non sólo pa la filoloxía asturiana, sinón tamién pa la filoloxía hispánica y románica, fixo que se fore adautando adulces a los nuevos parámetros que rixen la producción científica y a los que s’ha d’axustar cualesquier publicación d’estes carauterístiques. Ello esplica, ente otres coses por exemplu, que se desaniciaren les seiciones de «lletres vieyes», qu’atendía a la recuperación de testos n’asturianu, y de «lletres nueves», que recoyía aportaciones lliteraries de güei, testos vieyos y modernos de los que la institución se fai cargu n’otres coleiciones; que, nel mesmu sen, el númberu añal dedicáu a la creación lliteraria moderna que s’espublizaba pa festexar el Día de les Lletres Asturianes s’independizare de la revista y alitare por sí solu col nome que popularmente se-y dio, 12 Lletres Asturianes 104 (2011): 137-151 Lletres Lliterariu (nu 1, 2009; nu 2, 2010); que la periodicidá se fixe como semestral, con dos volúmenes al añu; que tolos artículos lleven el títulu, el resume y les pallabres-clave en dos llingües; que les normes de publicación seyan clares y precises y tean n’asturianu y n’inglés; que la revisión de los trabayos tea a cargu d’espertos y especialistes na materia que traten, preferentemente ayenos al responsable editorial; que se trabayare na visualización y promoción internacional de la revista, sollertes siempres a los apellaos índices d’impactu y al so conseñamientu nes bases de datos de revistes especializaes; y, de mou especial, que s’axustaren ya iguaren el Conseyu de Redaición y el Conseyu Científicu asesor.
Esti volume, que fai’l númberu 104 de Lletres Asturianes, respuende a estos nuevos criterios. la direición, la secretaría, el Conseyu de Redaición, el Conseyu Científicu asesor, la definición de la revista, la rellación de bases de datos, direutorios y portales onde se conseña, les referencies alministratives, asina como l’índiz de la revista, allúguense nes primeres páxines; los resúmenes, pallabresclave y normes pa la presentación de trabayos, nes caberes.
Decatárase’l llector de que, amás d’estos cambeos, Lletres Asturianes abandona’l formatu col qu’hasta agora-y llegaba y ufierta unu más acordies col que davezu amuesen les revistes especializaes de calter filolóxicu. El nuevu formatu obedez también al enfotu d’esta academia de qu’a partir del próximu númberu, Lletres Asturianes, amás d’asoleyase en papel, lo faiga dixitalmente, lo qu’ensin dulda facilitará la so consulta y sedrá un bon encontu pal so espardimientu internacional.
L’Academia de la Llingua Asturiana quier dar les gracies más fondes a tolos que, día tres día, faen que Lletres Asturianes seya una realidá vidable y, de mou mui especial, a los autores que xenerosamente mos apurren los sos trabayos y a los miembros del Conseyu de Redaición y del Conseyu Científicu asesor, que col so llabor curien el rigor científicu de los artículos inxertos en Lletres Asturianes.