Lletres Asturianes

Entamu

  Al faceme cargu de la presidencia d’esta Academia quiero que les mios primeres pallabres seyan de reconocencia pública y de sentíu agradecimientu al profesor García Arias que tan dueita y axustadamente la empobinó como primer presidente. De xusticia ye reconocer que si’l trabayu académicu d’estos años foi granible –y ensin dulda lo foi– ello débese en bona midida a la so persona. García Arias foi y ye pa min mayestru, collaciu y espeyu u me mirar. Con él compartí, na xera d’estos venti años, munches hores d’enfotos y trabayos, davezu perprestosos, dacuando amargurosos; y aguardo poder siguir deprendiendo y collaborando con él a lo menos otros tantos.

  El mio agradecimientu también a los profesores Ramos Corrada y González-Quevedo que, como presidente y secretariu, fixeron la transición selemente; y a los collacios de l’Academia que me dieron güei la so confianza. Que tean seguros de que fairé tolos posibles pa nun los defraudar.

  Quiero tamién afitar públicamente, una vegada más, el mio compromisu firme y estable pa cola llingua asturiana y pa colos sos falantes. Nesti sen, y siempre dientro de les llendes que marquen los estatutos de nueso, esta Academia curiará de los derechos llingüísticos de tolos asturianos. Personalmente entiendo que, al respeuto, l’algame de la oficialidá de la llingua ye un oxetivu irrenunciable.

  Conozo bien l’Academia. Formé parte de la so Xunta de Gobiernu como ayalguera de magar la so creación, dirixo los Cursos de Llingua Asturiana dende l’añu 1986, toi na Comisión de Lexicografía y Normativización que redactó les Normes; los Nomes de Conceyos, Parroquies, Pueblos y Llugares del Principáu d’Asturies; la Gramática; y el Diccionariu. Poro, cuido que tengo elementos abondos de xuiciu p’afirmar que l’Academia ye una Institución sólida y qu’asina se caltendrá, casi yá al marxe de la persona que la dirixa.

  Asumo tolos compromisos esistentes y toles estayes de trabayu ya investigación empri maes. Siguirá’l Programa de Formación (mañana mesmo fairáse la prueba de conocencia qu’añalmente convocamos en mayu); les Xornaes d’Estudiu, na seronda (que nesti añu tarán dedicaes al I Conceyu Internacional de Lliteratura Asturiana); l’Alcuentru Llingua Minoritaria y Educación, nel primer trimestre del añu; la cellebración del Día de les Lletres; los concursos d’investigación y de creación lliteraria; les publicaciones (de revistes: Lletres Asturianes, Cultures, Lliteratura, Entrambasauguas; de coleiciones; y otres); el trabayu más académicu empobináu a la normativización (y a la normalización social) y a la investigación, como ye’l trabayu lexicográficu, el toponímicu, l’Atles Llingüísticu d’Asturies o la ellaboración d’una Historia de la Lliteratura Asturiana na que se trabaya dende va más d’un añu, etc. Aguardo que nos cuatro años vinientes se dea una solución amañosa a vieyos temes pendientes: d’infraestructura, como ye’l llar social d’esta Academia; o de política llingüística (xeneralización de la enseñanza, igua de la toponimia, normalización social...); o d’otru tipu, como son la creación de la Llicenciatura de Filoloxía Asturiana na nuesa Universidá o la reconocencia de la oficialidá.

  Na próxima Xunta de l’Academia anovaránse los cargos de la Xunta de Gobiernu (Vicepresidente/a, Secretariu/a, Vicesecretariu/a y Ayalgueru/a) y propondré’l nuevu direutor/ra de los Cursos de Branu. Continuará la Secretaría Llingüística del Navia-Eo creada, nel so día, pa dar cumplimientu al puntu K de los Estatutos onde s’encamienta a l’Academia que promueva y curie la variedá llingüística gallego-asturiana.

  Entiendo que la llingua tien de ser elementu de venceyamientu y xuntura de tolos asturianos, percima de les ideoloxíes y postures personales o de grupu de caún de nós, y nesti sen l’Academia tará abierta a la collaboración con otres Instituciones, Organizaciones públiques o privaes, grupos sociales, etc. que rispan pola llingua y trabayen na mesma direición. Fairé los esfuerzos que faiga falta pa que l’Academia enllace con tolos sectores de la sociedá y asina ente toos seyamos quien a llograr que l’asturianu s’asitie nel llugar de respetu y dignidá que como espresión más fonda del nuesu pueblu-y correspuende.

  Pido la collaboración non sólo de tolos académicos y académiques,  sinón tamién de tolos asturianos y asturianes, pa poder llevar alantre’l llabor que se m’encamienta, convencida como toi de que la llingua ye patrimoniu de toos nosotros.

  Munches gracies.

  Uviéu, 25 de mayu del 2001.

 CompartirCorreoFacebookTwitter
Lletres Asturianes
Academia de la Llingua Asturiana
C/ L’Águila 10
33003 Uviéu
T. +34 985 211 837
alladixital.org
ISSN (versión dixital): 2174-9612
ISSN (versión impresa): 0212-0534
Depósitu Llegal: U-826/82
© Academia de la Llingua Asturiana