Entamu

  Per primer vegada la llingua asturiana tien unos currículos específicos pa la Educación Secundaria y el Bachilleratu. Los documentos qu’ellaborara una comisión d’espertos teníen la conformidá del Conseyu Escolar d’Asturies y axustábense a unos plantegamientos rigorosos y coherentes dende’l puntu de vista pedagóxicu y educativu en xeneral. Pero, desgraciadamente, nel últimu momentu la Conseyería de Cultura remanó esos documentos, camudando, en primer llugar, el nome de l’asignatura de “Llingua asturiana” pol de “Llingua tradicional: bable/asturianu”, nun intentu claru de rebaxar l’estatus llingüísticu del asturianu. Pero amás d’ello, la Conseyería corrixó’l conteníu del testu acordies cola ideoloxía qu’implicaba’l camudamientu del nome, desapaeciendo asina referencies fundamentales a la situación llingüística n’Asturies. Esta decisión del Gobiernu tuvo muncha con testación social, especialmente per parte del mundu de los enseñantes asturianos.

  L’Academia de la Llingua considera que l’actuación del Gobiernu ye un retrocesu gravísimu nel procesu de recuperación de la llingua asturiana y nun parará hasta llograr que l’asignatura de Llingua Asturiana caltenga’l so nome (sobro esti tema v. comunicáu de l’Academia de la Llingua Asturiana a lo cabero d’esti númberu y les demás notes y anuncies).

                                                                           ...

  L’Academia de la Llingua Asturiana tien que llamentar otra vuelta l’actitú de la Subcomisión d’Evaluación d’Humanidaes del Conseyu d’Universidaes de refugar, nel pasáu mes d’abril, los planes d’estudiu de la titulación de Filoloxía Hispánica de la Unversidá d’Uviéu por ufiertar asignatures de Llingua Asturiana.

  Lo más inxusto y esperpéntico ye que’l Conseyu quier, amás de torgar la nueva asignatura, desaniciar les que yá esistíen de Llingua Asturiana y que lleven unos cuantos años funcionando con muncha demanda d’alumnos. La Facultá de Filoloxía refugó dafechu la decisión de la citada Subcomisión y lo mesmo fixo la Conferencia Nacional de Decanos de les Facultaes de Lletres.

  Una vegada más l’Academia de la Llingua Asturiana tien que denunciar el tratu discriminatoriu y acientíficu, afitáu namái en prexuicios ideolóxicos, que la llingua asturiana recibe del Conseyu d’Universidaes.

                                                                           ...

  En xunu del 2002 presentóse l’avance de resultaos del Segundu Estudiu Sociollingüísticu p’Asturies, qu’amosaba la situación actual na que s’alcuentra la Llingua Asturiana. Les dos conclusiones más importantes que puen sacase d’esti avance son:

  1. En primer llugar, el grau d’aceutación de la llingua asturiana na sociedá ye cada vegada más grande. Una prueba d’ello ye que más del 60 por cientu de la población sofita la oficialidá de la Llingua Asturiana y que de forma unánime los asturianos camienten que l’asturianu ha tener el mesmu tratamientu que’l castellanu, el gallegu, el vascu y el catalán.

  2. Pela cueta, amenorga’l númberu d’asturianos que manifiesten tener la llingua asturiana como primer llingua.

  Estos datos, nuna sociedá democrática y moderna, obligaríen darréu a les autoridaes del Principáu d’Asturies a tomar les midíes amañoses pa torgar la sustitución llingüística y pa que l’idioma asturianu pueda, en futuru, ser una llingua d’usu normal n’Asturies. Too ello nun sedrá posible ensin algamar la oficialidá.

 Compartir