Entamu

Pasa’l tiempu. Pasen les selmanes y los meses y nun apuerten les soluciones qu’esixen los graves y vieyos temes pendientes de la llingua asturiana, en xeneral, y de la escolarización del asturianu, en concreto.

Si la situación na que s’alcuentra la nuesa llingua nun fore tan grave y llaceriosa, nun sedría tantu problema que les soluciones tardaren en llegar. Pero la realidá ye que l’asturianu tien tolos problemes d’una llingua minorizada, con mui ruina proteición y sofitu, nuna sociedá moderna y complexa. Como enseña perbién el II Estudiu sociollingüísticu d’Asturies de Llera Ramo, anque la población demanda mayoritariamente la oficialidá del asturianu, nun hai nin oficialidá nin midíes eficaces en favor del idioma. El tiempu cuerre escontra la llingua d’Asturies y eso fai que la responsabilidá de los políticos asturianos nun pueda escondese detrás de disculpes que yá nun convencen a naide a estes altures.

El casu recién d’una escolina d’Educación Secundaria d’un institutu d’Uviéu, que nun pue estudiar llingua asturiana como asignatura optativa nel so centru d’enseñanza, ye un índiz bien llamentable de cómo nun hai pal asturianu una política afayadiza d’escolarización que solucione les torgues concretes que surden nel sistema educativu. Yá bien de veces l’Academia de la Llingua Asturiana tien esclariao que, acordies cola curtia llexislación vixente, l’asignatura ha ser asignatura voluntaria en tolos niveles y graos, tien que ser enseñada dientro del horariu escolar y considerada como materia integrante del currículu; y amás d’ello, la escoyeta de l’asignatura en nengún casu podrá sirvir de motivu de discriminación de los alumnos nin podrá torgar qu’esos alumnos reciban la mesma formación y conocimientos n’igualdá de condiciones que’l restu del alumnáu. Asina lo afita l’artículu 10 de la Llei d’Usu. A la escontra de la llei, l’asturianu na Enseñanza Secundaria ye, en vez de voluntariu, optativu; esti calter optativu fai qu’al alumnu que lu escueye se-y torgue la posibilidá de recibir la mesma formación y conocimientos qu’al restu de los alumnos al nun poder cursar les otres asignatures qu’entren en competencia col asturianu, francés por exemplu. Y por si esto nun bastare, en dellos centros, como asocede nel mentáu institutu, nin siquiera s’ufierta, colo que la otra asignatura optativa,nesti casu’l francés, de ser optativa pasa a ser obligatoria.

L’Academia de la Llingua Asturiana entiende que fechos como ésti y otros de la mesma gravedá son ñicios inequívocos de la falta de seguranza xurídica que carecen los ciudadanos asturianos nel tarrén llingüístico y amuesen, una vegada más, la urxente necesidá del reconocimientu llegal del asturianu como llingua oficial nel Principáu d’Asturies.

Hai yá más d’un cuartu de sieglu que la sociedá asturiana sintió y manifestó la necesidá de da-y a la llingua asturiana les oportunidaes que-y faen falta pa siguir alitando nuna sociedá complexa como la nuesa actual. Yá nun hai argumentos pa pidir más tiempu, pa dexar pasar los años, pa siguir coles disculpes de siempre. A estes altures, namás los fechostienen yá sentíu: les mentires y les medies verdaes nun puen siguir engañando a naide.

 Compartir