Entamu

Hai munchu tiempu qu’una parte creciente de la sociedá asturiana pide la reconocencia oficial del asturianu. Pero esta demanda nun ye, como interesadamente se quier facer ver, una opinión más; nun ye una contribución más al debate de política cultural, sinón que ye la reivindicación d’un derechu.
En cuantes qu’institución que tien estatutariamente l’encargu de defender los derechos llingüísticos de los asturianos, l’Academia de la Llingua Asturiana lleva mui bien d’años denunciando que, de forma contradictoria colo que se fai n’otres comunidaes con llingua propia, sigue siendo l’idioma asturianu una llingua na que los sos falantes nun puen espresase nin escuchase llibremente, porque igual qu’en tiempos pasaos tenemos la triste realidá de que sigue prohibiéndose la presentación d’escritos n’asturianu, sigue tando ausente la llingua nos medios de comunicación social, sigue la enseñanza del asturianu dependiendo del voluntarismu y sigue habiendo otres munches torgues que nun puen recoyese de forma curtia.
Otramiente, gracies a coxuntures ayenes a la voluntá de los políticos asturianos, nos próximos meses pue dase la oportunidá de tener un nuevu Estatutu. Esperemos que la responsabilidá de los políticos asturianos nun los lleve a escaecer otra vuelta l’asturianu, porque eso yá nun podría ser más que la decisión consciente de querer que desapaeza del futuru d’Asturies la llingua propia del país.
Pero nestos momentos de ruin esmolimientu pola llingua asturiana per parte de munchos políticos asturianos dase con puxu creciente una actitú agresiva contra Asturies d’importantes sectores de la clas política de la vecina comunidá autónoma gallega. Estos sectores políticos gallegos quieren apropiase de les tierres más occidentales d’Asturies y pretenden qu’eses tierres asturianes, onde se mecen los rasgos llingüísticos gallegos y asturianos con otros específicos, son tierres de cultura y llingua gallega. Esto ye un falseamientu interesáu de la realidá cultural y llingüística y respuende namás a un espansionismu gallegu que ve na debilidá de los políticos asturianos la ocasión pa defender l’asturianidá llingüística y cultural de los asturianos que viven ente’l Navia y l’Eo.
Dende hai años l’Academia de la Llingua dedica munchos esfuerzos a la enseñanza del gallego-asturianu o fala eonaviega y gracies al llabor de muncha xente y coleutivos yá hai un camín abiertu pa da-y un futuru a la voluntá de los asturianos más occidentales: que se reconoza la so variedá llingüística como una variedá asturiana. Pero esto namás sedrá quien a afitalo la oficialidá de la llingua asturiana y del gallego-asturianu, como parte integrante del proyeutu cultural d’Asturies, non de Galicia.

 Compartir