Lletres Asturianes

Entamu

Dende cuantayá les universidaes españoles, en xeneral, y l’asturiana, en particular, vienen dedicando tiempu, recursos y enfotu al diseñu de les futures titulaciones universitaries qu’habrán tar arreyaes, necesariamente, al apelláu «Espaciu Européu d’Educación Superior».
El pasáu 26 de setiembre tuviemos conocencia de la cabera propuesta —que paez ser la definitiva— del Ministeriu d’Educación y Ciencia sobro «La organización de les enseñances universitaries
n’España». Magar que se trate namái d’un documentu de trabayu y d’una propuesta, y de qu’entá queden munches coses ensin afitar, al marxe de les modificaciones y axustes que se puean inxerir nel propiu documentu, la verdá ye qu’abre nueves perspeutives pa la Filoloxía Asturiana.
Sabío ye que’l vieyu tema pendiente, el del allugamientu de los estudios de la Filoloxía Asturiana dientro de la enseñanza reglada nes titulaciones de la Facultá de Filoloxía y de la Escuela de Maxisteriu, ta entá ensin una solución afayadiza. Al marxe d’otres considerances, ye de sentíu común que seya na Universidá d’Uviéu onde por principiu tea encartiyada la Filoloxía Asturiana; y de sentíu común ye tamién que los enseñantes de llingua asturiana nes estremaes estayes de la enseñanza non universitaria se formen de manera asemeyada a como lo faen los de les otres materies. Nesti sen, nun podemos escaecer que los profesores de llingua asturiana sufren un tratu discriminatoriu darréu que, amás del Títulu de Llicenciáu o de Maestru, tienen que tener respeutivamente’l Títulu Propiu d’Especialista o d’Espertu en Filoloxía Asturiana.
La nueva política ministerial, no que cinca al anovamientu de les enseñances universitaries dientro del marcu del Espaciu Européu d’Educación Superior, va empobinada al desaniciamientu del propiu conceutu de catálogu de títulos, concebíu como daqué zarrao, como ye’l que tenemos, y a la so sustitución por un sistema, enforma más flexible y abiertu, de rexistru; rexistru onde s’han inscribir tolos títulos organizaos pola universidá y que cuenten col preste de la Comunidá Autónoma pa la so implantación. Poro, el Ministeriu dexa en manes de les universidaes y de los gobiernos autonómicos la capacidá de diseñar y d’implantar les titulaciones que consideren afayadices, nel máximu respetu y reconocencia a l’autonomía universitaria y política de la comunidá.
Ensin dulda ye ésti l’encruz más favoratible de tolos que tuviemos hasta esti momentu pa llograr l’inxerimientu de la Filoloxía Asturiana dientro de les titulaciones universitaries. Aguardamos qu’ello permitirá dar rempuesta cumplida a les vieyes demandes y qu’ente toos —Universidá d’Uviéu y Gobiernu del Principáu— serán a buscar la meyor solución p’allugar los estudios de Filoloxía Asturiana dientro de los nuevos títulos de grau de la Universidá asturiana.

 CompartirCorreoFacebookTwitter
Lletres Asturianes
Academia de la Llingua Asturiana
C/ L’Águila 10
33003 Uviéu
T. +34 985 211 837
alladixital.org
ISSN (versión dixital): 2174-9612
ISSN (versión impresa): 0212-0534
Depósitu Llegal: U-826/82
© Academia de la Llingua Asturiana