Entamu

Va unos díes la Conseyería d’Educación y Ciencia del Principáu d’Asturies daba anuncia de la so propuesta de Decretu del Currículu d’Educación Primaria. Lo qu’en primeres debería ser un encontu nel procesu d’escolarización de la llingua asturiana non solo nun lo ye sinón que supón un retrocesu bultable, xustamente na única estaya educativa –la de la Educación Primaria– onde la ufierta de la llingua asturiana taba medianamente consolidada. Y ello por aciu de lo afitao na Disposición adicional segunda. 3. qu’establez que «Quienes no deseen cursar Lengua Asturiana realizarán actividades que contribuyan al desarrollo de competencias básicas, fundamentalmente con la competencia en comunicación lingüística, la competencia en el conocimiento y la interacción con el mundo físico, la competencia con el tratamiento de la información y competencia digital, y la competencia cultural y artística».
El conteníu d’esta disposión ye gravísimu y manifiestamente illegal. De llevase alantre supondría que l’asignatura de Llingua Asturiana dexaría de ser voluntaria pa pasar a ser optativa, en competencia non yá con ún, sinón con cuatro tipos d’actividaes de conteníu curricular. Poro, esfrónase dafechu contra la Llei d’Usu y Promoción del Asturianu que, como ye bien sabío, esplicita que «la escoyeta del estudiu o del emplegu del bable/asturianu como asignatura del currículu en nengún casu podrá sirvir de motivu de discriminación de los alumnos. Pa los que lo escueyan, el so aprendimientu o usu nun podrá torgar que reciban la mesma formación y conocimientos n’igualdá de condiciones que’l restu del alumnáu». El plantegamientu de la Conseyería, amás de ser perversu y discriminatoriu, inxer una grave contradicción darréu que si, d’un llau, diz que «los alumnos que no deseen cursar Lengua Asturiana realizarán actividades no curriculares», d’otru, ufiérta-yos el desendolque d’eses cuatro competencies básiques, que son un elementu constitutivu del propiu currículu.
Énte la gravedá de la situación, les reaiciones nun se ficieron esperar y la rempuesta foi unánime y enérxica, como dexó bien a les clares la manifestación del pasáu 17 de febreru, a la que llamaron los sindicatos d’enseñanza CC.OO.,FETE-UXT y SUATEA y la xunta pola Defensa de la Llingua Asturiana.
L’Academia de la Llingua Asturiana refuga dafechu’l conteníu de la citada disposición adicional y tará bien sollerte pa qu’esta situación s’igüe y l’asignatura de Llingua Asturiana tenga’l tratamientu curricular qu’esixe la llei; y, acordies con ello, pa que los escolinos y escolines que nun escueyan les enseñances de Llingua Asturiana nun faigan, como alternativa, otro que xeres didáutiques que nun impliquen, de nengún mou, el tratamientu de conteníos propios del currículu.

 Compartir