Entamu

El próximu mes d’abril la Universidá asturiana escoyerá al reutor o reutora qu’habrá empobinala a lo llargo de los cuatro años vinientes. Los candidatos que se presenten a les eleiciones son sabedores de qu’ente los temes a los que tienen que dar rempuesta atópesen dalgunos que cinquen a la llingua asturiana. Darréu d’ello y, anque entá nun teamos en campaña eleutoral, les sos declaraciones, intervenciones o programes espeyen, ye verdá que de mou más esplícitu nunos casos que n’otros, cuála ye la so postura y cuála va a ser la so llinia d’actuación al respeutive. L’Academia de la Llingua Asturiana valora positivamente esti facer porque xulga qu’ello ye niciu de que tamos nel camín de la normalización llingüística dientro de la institución universitaria asturiana.
L’ALLA, magar que munchos de los sos miembros de númberu seyan profesores universitarios, cuida que nun debe facer declaración pública denguna a favor o a la escontra de nengún candidatu o candidata, acordies colo que fai davezu en situaciones asemeyaes, pero sí tará sollerte, de mano, col conteníu de los programes y, llueu, cola so puesta en práutica.
En cualquier casu, el futuru Equipu de Gobiernu habrá facer frente al inxerimientu de los estudios de Filoloxía Asturiana dientro de los nuevos títulos de grau de la Facultá de Filoloxía y de la Escuela de Maxisteriu, allugamientu qu’agora nun va a depender más que de la propia universidá y del Gobiernu del Principáu d’Asturies. Y deberá facelo porque, amás de ser una vieya demanda, la Filoloxía Asturiana algamó nes décades caberes un desendolque científicu importante que-y permite tar güei al altor d’otres filoloxíes del ámbitu hispánicu y románicu; y porque los futuros enseñantes de llingua asturiana nes estayes educatives non universitaries (Primaria, Secundaria y Bachilleratu) nun puen siguir tando discriminaos con respeuto a les condiciones de formación esixíes pal restu del profesoráu de les materies llingüístiques.
Asina mesmo, el nuevu equipu habrá dar seguranza de que naide seya discrimináu pol emplegu de la llingua asturiana, faciendo por torgar que, por exemplu, se puea refugar la inscripción de tesis doctorales o l’almisión de documentos nel rexistru de la Universidá pol fechu de dir en llingua asturiana; y, arriendes d’ello, habrá trabayar pa que l’asturianu, pasu ente pasu, s’asitie con normalidá dientro de la comunidá universitaria.
Namái asina la Universidá dará cumplimientu al mandáu del Artículu 6 de los sos estatutos (La Universidá y Asturies):
1. La Universidá d’Uviéu, en cuantes qu’universidá pública asturiana, empobinará de mou relevante les sos xeres a la realidá y l’ámbitu d’Asturies.
2. La llingua asturiana sedrá oxetu d’estudiu, enseñanza ya investigación nos ámbitos que correspuendan. Asina mesmo, el so emplegu tendrá’l tratamientu qu’afiten l’Estatutu d’Autonomía y la llexislación complementaria, dándose seguranza de la non discriminación de quien la emplegue.
Aguarda l’Academia, en resume, qu’esti periodu de xestión universitaria valga pa encontar dafechu y definitivamente l’idioma d’Asturies dientro de la nuesa Universidá.

 Compartir