Entamu

Una de les estayes onde l’Academia vien trabayando con más enfotu dende va bien de tiempu ye na d’anovar, esparder y algamar la reconocencia de la llingua asturiana n’ámbitos d’estremáu calter. Ello lleva apareyao’l facilitar a los usuarios y persones interesaes l’accesu a la propia llingua y, al empar, a les publicaciones científiques a ella referíes y al restu de la so producción cultural y lliteraria. Nesti sen han entendese delles de les midíes tomaes pola Institución nos meses caberos.
Asina, el pasáu 15 de xineru, per aciu del alcuerdu robláu ente l’Academia, el Colexu d’Inxenieros n’Informática del Principáu d’Asturies y el coleutivu Softastur, surde’l Centru de Terminoloxía n’Asturies (TERMAST) que tien al so cargu la coordinación xeneral de les xeres terminolóxiques venceyaes a la llingua asturiana. TERMAST ellaborará y fairá alitar propuestes terminolóxiques que dean rempuesta a les necesidaes del idioma en contestos comunicativos especializaos: científicu, económicu, sociolóxicu, de les nueves teunoloxíes,... Toes estes propuestes serán de consulta llibre en rede al traviés de la páxina Web de l’Academia y de la coleición propia TERMAST. Propuestes de Terminoloxía Asturiana.
D’otra parte, y col envís d’encontiar la proyeición internacional del idioma, el 7 d’abril d’esti mesmu añu l’Academia firmó un conveniu con Google pal inxerimientu de tol so fondu editorial en Google Books. Poro, los usuarios y estudiosos de la llingua puen averase con facilidá, na llibrería virtual, a la bayura de publicaciones académiques y, si ye’l casu, mercar lo que-yos interese o ponese en contautu cola Institución pente medies de los enllaces y direiciones nella  conseñaos.
Más de recién, el 3 d’ochobre, l’Academia robló otru pautu de collaboración, nesti casu col conceyu de L.lena, pa trabayar n’andecha en materia llingüística acordies colo que l’ALLA fai davezu nesti tarrén. L.lena encartíyase dientro del grupu de conceyos que dende cuantayá, y con iniciatives y midíes estremaes (declaraciones de cooficialidá, reglamentos de billingüismu, ordenances municipales, oficialización de la toponimia…), trabayen pola dignificación, espardimientu, reconocencia y normalización social del idioma.
Sicasí, nin podemos nin debemos nin queremos anunbrir la realidá. De nada nun valdrán nin la proyeición internacional, nin l’anovamientu y axuste normativu de los lléxicos especializaos, nin toles polítiques de normalización, feches o por facer, de los conceyos o del propiu gobiernu, si nun se llogra d’una vez un marcu llegal afayadizu qu’afite oficialmente’l nuesu idioma. Pela parte de nueso, siguiremos rispiendo por ello y reclamando la reconocencia cimera de la llingua asturiana dientro de les llendes del territoriu d’Asturies: la cooficialidá.

 Compartir