Entamu

L’adautación de les enseñances universitaries al Espaciu Européu d’Educación Superior supun­xo pa la llingua asturiana, per primer vegada na hestoria, el so inxerimientu acionáu, nun conxun­tu de materies homexénees y coherentes, nos planes d’estudiu de los estremaos títulos oficiales de la Universidá d’Uviéu. Asina, na Facultá de Filoloxía, los 48 ECTs del apelláu Minor n’asturianu puen ser cursaos dientro de cualquiera de los nuevos Títulos de Grau; los estudiantes de Maxiste­riu puen escoyer ente les menciones que­yos ufre’l so títulu la Mención de llingua asturiana; y lo que ye más importante y polo que cinca a los estudios de máster, el Máster de Secundaria, que ye l’únicu máster que dientro de la Rama d’Artes y Humanidaes capacita llegalmente pa exercer una profesión, la de Profesor d’Enseñanza Secundaria, contempla la Especialidá d’asturianu con una cadarma asemeyada a la del restu de les especialidaes. Estes titulaciones, verificaes pola ANECA, aprobaes pola Universidá d’Uviéu, aprobaes pol gobiernu central y autorizaes pol gobiernu del Prin­cipáu d’Asturies, entamaron a impartise esti cursu 2009­2010 (casu del Máster de Secundaria) o emprimarán nel viniente 2010­2011 (graos de Filoloxía y de Maxisteriu).
Ye esti, ensin dulda, un llogru importante pol que venimos rispiendo y trabayando dende estayes bien diferentes y dende fai mui bien d’años munchos asturianos y asturianes.
Esta «normalidá» de la llingua asturiana nes enseñances universitaries enllaza col fechu de que dende’l cursu 2007 esista un Currículu Oficial de Llingua Asturiana y Lliteratura pa la Educación Primaria, Secundaria, Bachilleratu y Educación d’Adultos que fixa los oxetivos, conteníos, méto­dos y criterios d’evaluación, acordies colos plantegamientos de la LOE, pa los alumnos y alumnes que cursen estos estudios; y, arriendes d’ello, con que nel 90% de los centros públicos de Primaria y de Secundaria imparta docencia l’área de Llingua Asturiana. Y nun pue ser d’otra miente si se quier dar rempuesta a la llegalidá n’usu, esto ye al mandáu del propiu Estatutu d’Autonomía d’As­turies y a la Llei d’Usu y Promoción de la llingua asturiana.
Sicasí, magar l’avance que supón la regularización oficial de la formación del profesoráu de llin­gua asturiana, hai entá un problema de fondu ensin resolver: el de la creación de la Especialidá de Llingua Asturiana n’Educación Primaria y Secundaria, de mou qu’especialidá tala se reconoza, co­lo qu’ello lleva arreyao, al profesoráu que la tien. ¿Cómo ye posible que se dea contradicción tan bul­table? ¿Cómo ye posible que, d’un llau, les autoridaes académiques y polítiques pongan los medios pa titular y capacitar a los que van a desempeñar una profesión regulada per llei y que, llueu de titu­lalos y capacitalos, les mesmes autoridaes polítiques nun­yos reconozan nin la titulación nin la ca­pacitación porque la especialidá de Profesor de Llingua Asturiana nun existe?
Ye urxente que se faigan tolos posibles pa solucionar esta gran contradicción, col envís de dar se­guranza de manera afayadiza a la enseñanza de la llingua asturiana nes estremaes estayes non uni­versitaries. Nun s’ha escaecer, nesti sen, que’l Conseyu Escolar del Estáu, muérganu cimeru con­sultivu en materia educativa, pidió acuantayá a les autoridaes polítiques la creación d’esta especiali­dá, creación que ta sofitada asina mesmo polos sindicatos d’enseñanza y pola Xunta de Personal Docente non universitariu del Principáu d’Asturies. D’otru llau, nel pautu de gobiernu robláu ente les fuercies polítiques que güei mos gobiernen (FSA­PSOE ya IX­BA­Verdes) inxerse’l compromisu d’a­topar la solución llegal pa la creación de la Especialidá de Profesor de Llingua Asturiana.
¿Ú, entós, el problema? ¿Tamos, otra vuelta, énte compromisos que nun signifiquen nada, énte promeses ensin cumplir? La dignidá de la llingua asturiana y de los sos enseñantes rique urxente­mente la reconocencia llegal de la profesión de Profesor de Llingua Asturiana. Y al gobiernu d’As­turies correspuende afayar el camín.

 Compartir