Entamu

Primeros pasos de la Universidá Asturiana de Branu (UABRA)

El pasáu 10 de setiembre pesllóse nel Aula Magna de la Universidá d’Uviéu lo que foi la primera edición de la Universidá Asturiana de Branu, que surde llueu de la robla d’un pautu de collaboración ente la Universidá d’Uviéu, cimera institución académica del Principáu, l’Academia de la Llingua Asturiana, máxima institución en llingua asturiana, y el Conceyu de Cangas del Narcea onde s’asitiará’l so llar permanente. Zarra asina l’Academia una fas importante del so programa formativu y emprima otra de llendes abondo más amplies, n’andecha cola universidá uvieína, u queden encartiyaos los sos Cursos de Branu (vid. más alantre pxs. 134-135).
Arriendes d’ello, la UABRA cunta col sofitu de la Conseyería d’Educación y Ciencia darréu que si, d’un llau, nesti programa formativu encartíyense por mandáu de la propia Conseyería los Cursos de Capacitación en gallego-asturianu, d’otru, tol programa formativu tien la reconocencia oficial de la citada Conseyería al tar acreitada l’Academia como «Entidá Organizadora d’Actividaes de Formación Permanente del Profesoráu», acordies colo conseñao nel Decretu 62/2001 de 28 de xunu (BOPA de 13 de xunetu) y na Resolución de 3 d’ochobre de 2001
(BOPA de 20 d’ochobre).
La UABRA surde col enfotu d’enllazar col espíritu de lo que foi y ye la meyor Estensión Universitaria que tantu prestixu supunxo pa la universidá asturiana, enraigonándose dafechamente na sociedá a la qu’Universidá y Academia se deben. D’ehí que seya tan importante que’l pautu inxera a ún de los conceyos asturianos más representativos, el conceyu de Cangas del Narcea.
Nesti sen ún de los finxos pelos que la UABRA s’empobina ye’l del estudiu de la realidá social y cultural asturiana y el del so espardimientu social, tomando siempres como ferramienta de comunicación y xuntura la llingua asturiana.
Los cursos de formación llingüística sedrán ún de los noyos centrales de la UABRA, pero a ellos amestaránse otros qu’algamen les estremaes estayes del conocimientu.

Ye pruyimientu d’esta Academia que la Universidá Asturiana de Branu seya una entidá dinámica, qu’acueya añu tres añu al mayor númberu posible y al más dueitu profesoráu universitariu, xunto a especialistes d’otres estayes; qu’edición tres edición enanche la so propuesta formativa; que branu tres branu agrande’l númberu d’alumnos. Y too ello col procuru de venceyamos cada vegada más a la sociedá asturiana, dende la villa de Cangas u s’asitia’l llar d’esta Universidá Asturiana de Branu.
Tamos convencíos de que col gabitu de toos la UABRA tendrá un futuru bien granible pa l’Academia, pa la Universidá y, lo que ye abondo más importante, pa la propia Asturies.

 Compartir