Entamu

Ilmu. Sr. Presidente

Xunta Xeneral del Principáu

Uviéu

En carta de 18 d’ochobre, el Sr. Presidente de la Xunta Xeneral del Principáu d’Asturies solicita d’esta Academia informe sobre la lletra del «Himnu d’Asturies», darréu que so la música, paez, hai ya pautu ente les presones que s’enxerten na comisión fecha al efeutu y que tamién preside’l Sr. Presidente de la Xunta Xeneral.

Esta Academia de la Llingua Asturiana, en xunta de 28 d’ ochobre, apautóse pa testimonia-y la so fonda preocupación porque puean presentase estes consultes, de nun tener un criteriu prefixáu.

Estráña-y a esta Academia que nun se tenga concencia nidia de cuála ye la llingua d’Asturies y, darréu, en qué llingua ha cantase l’himnu del pueblu asturianu. Estráña-y sobre tou dempués que l’Estatutu d’Autonomía dexare pernidio cuála ye la llingua hestórica asturiana al enxertar nel títulu preliminar un artículu dedicáu al bable.

Entrugar a estes altures sobre si l’himnu del Principáu pue dir n’otra llingua cualaquiera que nun seya l’asturiana pieslla la mesma atitú que si se plantare cuála ye la nuesa bandera dlnuesu escudu, símbolos tamién del nuesu ser coletivu. ¿Entrugaría daquién si la nuesa bandera habría ser viola, o encarnada y mariella? ¿Entrugaría daquién si’l nuesu escudu había ser un aigla con barres, granaes, cadenes, lleón y castiellu? Non. Ye claro que non porque ta pernidio que los pueblos tienen símbolos estremaos ensin qu'ello vaye a la escontra de la so col! aboración y xuntura. La nuesa bandera ye azul comu la Cruz de la Vitoria ta nel nuesu escudu y de la mesma manera que’l bable ye la llingua asturiana.

Duldar a estes altures de coses asina d’ elementales plantearía otres duldes más fondes sobre delles capacidaes coletives y sobre si l’atitú de los políticos d’Asturies ta por arrenunciar a representar a un pueblu diferenciáu sustituyéndolu per una provincia na que sobren himnos, escudos, competencies, xuntes, comisiones, etc.

Bien a la escontra, xulgamos que la dotación inteletual de los representantes del pueblu asturianu llevarálos a pescanciar que’l llaceriosu presente llingüísticu y cultural esplícase dafechu pel grau d’alloramientu de tou tipu a que sometieren a esti pueblu. Y más, que situación tala ye reversible siempre qu’un bon enfotu políticu-y dea puxu.

Apocayá, el Sr. Presidente del Principáu, nuna carta valiente empobinada a una organización privada, pedía que la llingua asturiana tuviere presente nos cancios d’un coru que diba oyese bien lloñe de les llendes asturianes y españoles. Nun sería a entendese, ciertamente, que l’himnu del pueblu que re presenta’l Sr Presidente delantre de tolos pueblos, se cantare n’otra llingua que nun seya la nuesa. Tampocu nun sería a entendese que los partíos enxertaos na Xunta Xeneral, y que fexeron l’Estatutu d’Autonomía tomaren determín grave escontra la llingua y la identidá del pueblu asturianu.

Esta Academia nun pon en dulda que l’himnu del Principáu será, xuiciosamente, n’asturianu, acordies cola normativa académica.

Queda a la so disposición.

Uviéu, 30 d’ochobre de 1983.

El presidente

 Compartir