Lletres Asturianes

Entamu

Un ponderáu contentu

 

El llunes 19 de setiembre, nel so despachu oficial, recibía'l Presidente del Principáu, Sr. de Silva, a l' Academia de la Llingua Asturiana. A lo llargo tres cuartos d'hora esta Academia punxo na conocencia de l'autoridá cimera d'Asturies les preocupaciones que cinquen la so función na sociedá asturiana.

Cuatru yeren los puntos nos qu'afondar:

1. Problemes d'infraestrutura de l'Academia.

2. Desarrollu del artículu 4 del Estatutu d'autonomía: enseñanza.

3. Desarrolludel mesmu artículu nos aspeutos d'espardimientu de la llingua: medios de comunicación.

4. Endrechamientu de la toponimia.

Les palabres del Sr. Presidente, dempués de la información necesaria, foron perestimables prometiendo, darréu, les soluciones al apartáu primeru y proponiendo caminos pelos que s'empobinar pal llogru de los demás finxos.

Agora mesmo ya, comu'l Sr. Conseyeru de cultura mos fai ver, a mediu mes de la entrevista, pescanciamos que la totalidá de los puntos trataos recibieren una contestación que, sinón siempre la más afayaíza dende los presupuestos de l'Academia, sí pue, de mano, xulgase positiva. L'Academia contará llueu con una sede provisional. Una xunta foi fecha pal desendolcu del artículu 4 del Estatutu. Una xunta tamién s'encarga de la igua toponímica.

L'Academia, muérganu apartidista dafechu, nun pue por menos d'asoleyar el so más ponderáu contentu al dase cuenta de que les palabres y promeses del Sr. Presidente (ver tamién p. 110 d'esti boletín) tradúcense nuna realidá valoratible. Esta mesma Academia, que cola mayor de les llibertaes y col meyor respetu foi y será crítica colos poderes públicos cuandu'l so facer nun s'axuste a les sos promeses o a los sos presupuestos llingüísticos y culturales, nun pue menos de pedir qu'esa realidá nueva qu'agora s'entama seya granible llueu, ensin tardances, entainando, pa darréu contar col decretu billingüismu, que la llingua tea enxertada nos medios de comunicación y los nomes de los llugares recobren el so tastu asturianu.

Per otru llau, la dotación presupuestaria y de presonal alministrativu, xunto cola atopadiza definición llegal, faise necesario p'afitar l'Academia, freba de la recuperación cultural.

Namái asina fadráse que'l contentu que güei somos a asoleyar seya daqué más qu'un niciu de que los finxos que lloñe se llanten tán sofitaos na seriedá d'istituciones y presones.

 CompartirCorreoFacebookTwitter
Lletres Asturianes
Academia de la Llingua Asturiana
C/ L’Águila 10
33003 Uviéu
T. +34 985 211 837
alladixital.org
ISSN (versión dixital): 2174-9612
ISSN (versión impresa): 0212-0534
Depósitu Llegal: U-826/82
© Academia de la Llingua Asturiana