Entamu

Acordies colos camudamientos llevaos alantre en Lletres Asturianes, de los que se dio anuncia nel númberu 104 (marzu 2011), col envís de que la revista algamare la máxima valoración según los parámetros afitaos internacionalmente pa les publicaciones de calter científicu, los llectores podrán alvertir nesti númberu 105 dellos axustes, más bien de tipu formal, que cinquen, por exemplu, al allugamientu de los «Resúmenes», asitiaos agora al entamu de cada artículu, o al cambiu de páxines de la estaya «Reseñes», que s’adelanta a la de «Notes y Anuncies».

Al empar, y como yá se dixere nel «Entamu» del citáu nu 104, dende esti númberu 105 Lletres Asturianes asoleyaráse tamién en formatu dixital. A esta publicación pue accedese llibremente dende’l sitiu acutáu pa ella na páxina web de l’Academia de la Llingua Asturiana, www.academiadelallingua.com.

L’ALLA, perenfotada nesta nueva ufierta dixital, aguarda con ello facilitar la consulta de la revista a tolos estudiosos y persones interesaes, na seguranza del bon encontu que supondrá pa la Filoloxía Asturiana y pa la nuesa llingua.

 Compartir