Lletres Asturianes

Entamu

Normalización

Faer l’Estatutu d’Autonomía p’Asturies supunxo que los partíos que daquella s’inxeríen nel Conseyu Rexonal –Ios mesmos qu’agora na Xunta Xeneral– tuvieren que se comprometer cola redación del artículu 4 y 10, esto ye colos que dexaben afitase les posibilidaes de futuru a la llingua, a la so enseñanza y al so espardimientu nos medios de comunicación. Del mesmu xeitu supunxera un compromisu apautase nel algame de l’Academia de la Llingua meses enantes.

De toes maneres nun se vio, per otru llau, que’l so enfotu fore más lloñe qu’aquelles declaraciones de principios qu’entós s’inxeríen na llegalidá. Les eleciones al Parllamentu Español nun-yos dieron oportunidá, a xulgar peles sos campañes, de falar de la llingua y cultura d’esti pueblu.

Agora, de toes formes, coles nueves eleciones ehí mesmu ya, coles eleciones a la Xunta Xeneral y a los conceyos, bien taría que lo que foi escaecío apocayá y lo que quedare entamao namás nel Estatutu s’arrecoyere y tamién iguare y acuriosare .pa presentalo más fecho, y trabayao ai eletor.

Xustamente tendríen qu’asoleyar les sos postures no que cinca a la NORMALIZACION de la llingua. Non tantu a la so normalización llingüística o normativización, que pa eso ta l’Academia y les opiniones de los llingüistes, sinón a la NORMALIZACIÚN SOCIAL, aquélla que cinca toa una riestra aspeutos qu’empobinen a l’acetación del fechu llingüísticu y al puxu de la llingua.

Nidiamente tendríen que se manifestar cómo pescancien faer realidá que la llingua entre na enseñanza y cuándo. Cómo la llingua tien que tar nos medios de comunicación, cuándo y por qué non ya. Cómo la llingua tien que dir entrando na Alministración, con qué prudencies, con qué garantíes, pero ensin dexar por ello que mos pobreza más. En fin, verías e bien que daqué más que palabres pal momentu se dixeren y, enforma ~ás, prestaríen nicios de que se perafiten nuna llinia asturiana del so faer políticu.

Una lletura posada del «Informe SADEI», traíu a cuentu apocayá per un políticu, nun vendría mal nestes dómines en que les peticiones populares y les preocupaciones de la xente tapécense per glayíos de los más vocinglones o per carrellaes de tinta de los menos amigos. Esi bon porcentax d’asturianos favoratibles al bable mereceríen que se mirase un rispiu más pela so llingua hestórica y, lóxicamente, pela so normalización.

 

Cultura Asturiana

Abondes vegaes el términu cultura asturiana usóse ensin munches preocupaciones crítiques. Per cultura asturiana podía pasar cuasimente too, sobre too lo fecho n’Asturies. Falábase –y fálase– d’una música asturiana, d’una pintura asturiana, d’una gastronomía asturiana, d’un teatru, d’una lliteratura...

Uueu, a les espresiones espardíes allegremente axuntóse la preocupación merc:antilista onde –el nome asturianu entá viende– per asturianu quíxose faer pasar tou produtu que fexere –muncho o poco, nun da más– dalguna referencia al nuesu país. Y asina, n’efeutu, llégase a que col pretestu d’entamar trabayos de cultura s’afonde na idea de que la cultura asturiana nun esiste o nun ye sustantiva o que cultura asturiana ye la cultura que llamen «universal» (esto ye «española»), fecha equí, n’Asturies o per asturianos de nacencia o d’una adoción acabante faer.

Enancharon tantu’l conceutu que’l conceutu nun val. Nun ye afayaízu sinón pa llegar a la so mesma negación, al so mesmu esaniciu.

Pero eses condutes nun seríen tan perxudiciales si nun tuvieren enxertaes nel procesu d’aculturación nel qu’Asturies, el pueblu, s’inxere. El qu’opiniones estremaes dixebraren postures según ideoloxíes, conveniencies o enfotos nun ye cosa que pase de ralo’n ralo sinón daqué normal nuna sociedá moderna y llibre. En realídá negar la cultura asturiana diferenciada ye tan biliesgo que’n llugar de macizar nun val más pa que xente nueva vaye a la gueta de meyores y más asturianos cebos. La rede ayena -por ser ayena- entá nun se filó tan fino qu’acabe con tolos pexes.

Más de preocupar ye que delles istituciones de «cultura» tengan unos mesmos prexuicios y nel so enfotu d’enxertalo TOO, dexen de faer una política cultural asturiana. Cuérrese esi peligro. Más. Nesi pielgu tase non ayuri, non dacuandu, sinón de contino.

Atalantar, per exemplu, que les Istituciones, les propies d’Asturies, tienen que facer equí una política cultural na que lo específico asturiano seya numái un elementu «típicu» qu’axuntar a la so xera ye empobinase permal. La otra cultura tien los sos calces bien trabayaos. Tien los sos funcionarios perbién enseñaos. Tien el so futuro ganáu col control ideolóxicu abenayá espardu, cuantayá oficializáu, cuentaguéi asitiáu nos meyores y más rellumantes llugares. Nun cuerre, non, dengún peligro. L’únicu peligro que güei se da apunta a la cultura asturiana a la que, dellos, quixeren ya corar anque entá nun lo algamaren.

 CompartirCorreoFacebookTwitter
Lletres Asturianes
Academia de la Llingua Asturiana
C/ L’Águila 10
33003 Uviéu
T. +34 985 211 837
alladixital.org
ISSN (versión dixital): 2174-9612
ISSN (versión impresa): 0212-0534
Depósitu Llegal: U-826/82
© Academia de la Llingua Asturiana