Lletres Asturianes

Entamu

Un rispiu más tolos díes altita l'emplegu la llingua. La so istitucionalización supunxo, de xuru, un bon encontu al llabor que cuantayá se fai nesi sen. El pesu llegal del bable nel Estatutu, anque ya mos abaga la so prática, alluma ú'l camín empobina.
El xestu del Gobiernu del Principáu asitiando simbólicamente la llingua na xunta de Sabugo, el día d'Asturies, más que xestu y símbolu ye niciu de la frada que, sele, va faciéndose na nuesa sociedá, favoratible a 10 asturiano.
El qu'un conceyu, el de Casu, ensin un solu votu a la escontra, s'apaute pa que'n bable apaezan tolos sos bandos nun dexa d'afitar que rispir pela caltenencia la llingua va más lloñe de les modes y perafonda'n pueblu.
El trabayu que se fai col bable comu estrumentu afayaízu de comunicación ciudadana, científica y artística ta dando resultaos granibles que puxen pa que nueva xente la entame cola so recuperación.
De toes maneres naide glayaría al alto la lleva, nin burbusaría a la oreya de naide, qu'asina ta too iguao. Pescanciar que se va bien empobináu nun tien d'entendese comu prenda d'algamar más finxos.
Son munches les estayes ensin andecha. Son enforma los llugares onde nun se fai un res pela comunicación en bable. Son abondos los requexos ú añera'l paicer de que nun hai rendimientu pa quien recobre la llingua prindada.
Asina, el brinde continu al so emplegu ha llevar inxería una prática güei lloñe de la realidá: la de dar puxu a tolo que, valoratible, se faiga n'asturianu y al que n'asturianu fale.
Namás que cuandu la xente qu'estudia y trabaya se dea cuenta qu'una valoración social y una coHecha prática siguen darréu a quien remane la llingua, entainaremos nel nuesu camín. Namái cuandu a los asturianos yos pruya'l bable social y profesionalmente seremos a ver perafitáu'l so futuru.

 CompartirCorreoFacebookTwitter
Lletres Asturianes
Academia de la Llingua Asturiana
C/ L’Águila 10
33003 Uviéu
T. +34 985 211 837
alladixital.org
ISSN (versión dixital): 2174-9612
ISSN (versión impresa): 0212-0534
Depósitu Llegal: U-826/82
© Academia de la Llingua Asturiana