Entamu

A LA XENTE D'ASTURIES

Aprobada pel Conseyu Rexonal d'Asturies L'Academiá de la Llingua Asturiana y fecha la so presentación, les persones que mos axuntamos nella queremos facer un llamamientu públicu a toles autoridaes, medios de comunicación, periodistes, artistes, profesionales, trabayaores y xente'n xeneral pa que, caún según les sos posibilidaes, entame un trabayu fondu y solidariu pal emplegu y difusión dafechu de la llingua asturiana.
Somos sabeores de les grandes torgues que tendremos que quitar pa llevar darréu la xera que nesti momentu tenemos entamanada. Somos sabeores tamién que cola bona voluntá de toos llograremos que la llingua asturiana algame díes meyores.
Nun ye'l nuestru enfotu presente ufiertar una dotrina llingüística salvaora de los munchos problemes culturales y sociales que s'amiesten na sociedá asturiana. Tampocu nun ye la nuestra posición la de presentamos como protagonistes del facer cultural asturianu. Sabemos, eso sí, la emportancia que pue tené la llingua na identidá asturiana y ensin despreciar otres iniciatives empeñarémonos n'ufiertar a quien-y pete delles de les posibilidaes que s'inxeren na nuestra llingua hestórica.
Nesi sen comprometémonos pa entamar darréu'l trabayu normalizaor y, en primer llugar, proponémonos redatá les normes ortográfiques de la llingua como trabayu primeru que llueu y col tiempu tendrá que completase cola redación d'una gramática normativa y con un dicionariu ortográficu y d'autoridaes. 
Al mesmu tiempu dende l'Academia de la Llingua y cola collaboración d'otres fasteres asturianes proponémonos poner al dereches tola toponimia oficial asturiana pa que'l Conseyu Rexonal, muérganu cimeru políticu, puea asitiala.
Al mesmu Conseyu Rexonal proponémos-y que, según queda afitao nel proyeutu d'Estatutu d'Autonomía, entame llueu la negociación colos responsables del Ministeriu d'Educación y Ciencia pa que la nuestra llingua, pasu ente pasu, pero ensin dexar más tiempu al tiempu, s'adientre na enseñanza.
Sabemos perbién que les meyores disposiciones llegales puen quedar en papel moyáu si nun se ponen toles posibilidaes nel llogru. Poro, siendo conoceores de la situación de la sociedá na que s'alcuentra la llingua asturiana y la emportancia de la so difusión y del desaniciu de los mieos de tou tipu que la arrodien, será tamién el Conseyu Rexonal quien tenga que negociar, agora mesmo ya, la entrada de la llingua nos medios de comunicación social del Estáu asitiaos n'Asturies (Prensa, Radiu, TV). L'Academia de la Llingua pide a tola xente asturiana que, ensin mieu nengún, ensin prexuiciu dalgún, emplegue la so llingua en tou tipu d'atividaes y en toles circustancies.

Asturies, 16 - 5 - 1981

 Compartir