Preséntase nesti estudiu críticu, a través de cinco apartaos, un análisis temáticu de la poesía asturiana de los caberos quince años no que se refier a la identidá personal y coleutiva de los poetes en llingua asturiana. Partiendo del fechu, bien constatáu pola crítica, de la presencia, definida como «sentimientu de la tierra», de la señaldá y del tópicu del tempus fugit en rellación col paisaxe y la identidá asturianes como constantes na obra poética d’estos años, l’autora, consciente de l’ambivalencia de la etiqueta, allíniase na so defensa, en cuantes qu’esta poesía llogra promover la identificación emotiva de los llectores, creando nellos conciencia de «sentimientu de pertenencia» a un mundu en riesgu de desapaición y contribuyendo d’esta miente al reforzamientu del discursu identitariu. Al mesmu tiempu, niega un supuestu frayamientu xeneracional nel caltenimientu d’esta temática.
Lliteratura asturiana, poesía contemporánea, «sentimientu de la tierra», «sentimientu de pertenencia», aculturación, espaciu simbólicu común