Conceyu Bable (CB): algunas claves de su nacimiento y rápida expansión

Marcos Rodríguez Álvarez

Resume

La nacencia de Conceyu Bable nel añu 1974 supón el xurdimientu del movimientu de recuperación y reivindicación de la llingua asturiana y, acullá d’ello, l’apaición del asturianismu modernu. Nel cincuentenu aniversariu del so orixe, esti artículu quier esquisar nos fautores que favorecieron l’espoxigue d’esta corriente y el so espardimientu social. Pártese pa ello d’una contestualización de la realidá idiomática asturiana na dómina franquista, p’afondar darréu nes claves qu’espliquen, nesi escenariu, el xurdimientu y la espansión de Conceyu Bable. Nesti sen últimu, consideramos la intervención d’aspeutos de calter ambiental (1) y d’elementos de triba personal (2) como fautores esclariadores del fenómenu conceyista. 1) L’Asturies de les últimes décades del franquismu ta marcada, ente otres cuestiones, pola crisis socioeconómica, pola creciente politización y resistencia social escontra’l Réxime, pol dinamismu cultural y polos cambeos na esfera informativa. Nesti ambiente, entama a xurdir, como oposición al imaxinariu identitariu desplegáu pola Dictadura y como óptica p’ameyorar la comprensión sobre les problemátiques del país, una conciencia rexonalista difusa y embrionaria.2) Los fundadores de Conceyu Bable, estrenchamente coneutaos col ámbitu rural, tienen l’asturianu como idioma familiar. La so esperiencia universitaria va sirvi-yos pa conocer teoríes llingüístiques qu’espliquen la situación del idioma llariegu como llingua autónoma allugada nun marcu de conflictu, pa reconocer les sos posibilidaes de recuperación social y pa columbrar les sos potencialidaes como puntu nodal pa la reivindicación d’una Asturies autónoma y democrática. Col envís de facer públiques les sos idees, dan forma a un esperimentu periodísticu —posible gracies a los cambeos asocedíos nel ámbitu informativu—, una tribuna denomada Conceyu Bable, que va convertir a los sos autores nun grupu de vanguardia con capacidá pa disponer les bases estratéxiques y teóriques d’un proyeutu que va sirvir d’abellugu y referencia pa esi sector de la sociedá con enfotos asturianistes incipientes.

Pallabres clave

Conceyu Bable, llingua asturiana, franquismu, asturianismu, reivindicación llingüística

Artículu en pdf Compartir