«Atiendi, Asturies, atiendi»: los efeutos de la interpretación musical y coleutiva de dellos poemes de Manuel Asur

Daniela Cortina González

Resume

Nesti trabayu preséntase un análisis del impautu que tuvo na sociedá asturiana la musicalización de dellos poemes de Manuel Asur de mano del grupu Nuberu. Pa ello, primeramente, fadráse un percorríu pel contestu históricu y políticu nel que surden, centrándose nel orixe, actividá y oxetivos de Conceyu Bable. Amás, describiráse l’actuación ya interaición d’otres organizaciones y movimientos culturales del momentu como Camaretá y el Nuevu Canciu Astur. Tres d’amosar delles idees al rodiu del contestu lliterariu que los carauteriza, pasará a presentase un análisis lliterariu de los poemes seleicionaos, nel que, teniendo en cuenta la interaición ente música y lletra, inxeriránse unos comentarios mínimos relativos a la so musicalización. Siguidamente, y teniendo presente’l contestu analizáu, pasará a reflexonase sobre los efeutos que tuvo’l pasu de los poemes a cantares, analizando les carauterístiques sociales ya ideolóxiques del públicu que los recibía. Amás, describiránse los mecanismos testuales emplegaos por Asur pa terminar d’axustar esi públicu ideal: léxicu, referentes, temátiques... Valorando la importancia que tuvo pal contestu la popularización de les poesíes gracies a los cantares, posaránse delles idees al rodiu de la interpretación coleutiva que se daba nos conciertos de Nuberu. Asina, consideraráse cómo esto determinaba la manera d’entender los cantares y cómo’l públicu interaicionaba con ellos y col restu d’asistentes. Como posibles futures llinies d’investigación, presentaránse delles reflexones sobre la vixencia de les idees del Nuevu Canciu Astur y la so influencia na música asturiana posterior, estableciendo comparances ente los cantares analizaos y dellos otros más contemporáneos. A la fin, l’oxetivu del trabayu ye ser a entender la relevancia que tuvo, pal contestu y pa la sociedá asturiana, l’apaición d’unos cantares —y unos nucleos de receición de los mesmos— que, con una sonoridá moderna, yeren a tresmitir los esmolecimientos de toa una xeneración na llingua del país.

Pallabres clave

interpretación coleutiva, reivindicación llingüística, musicalización, Nuevu Canciu Astur

Artículu en pdf Compartir