De la evolución y del (escasu) caltenimientu del sufixu protorrománicu */-ˈjon-e/ n’asturianu

Hugo Carbonnelle

Resume

Esti trabayu tien por oxetivu estudiar la evolución del sufixu protorrománicu */-ˈjon-e/ n’asturianu modernu. Esti morfema tien una llarga historia: n’efeutu, pue reconstruise en protoindoeuropéu y en protoitálicu; ta atestiguáu enforma en llatín y tamién se pue reconstruir en protorromance gracies a la comparanza de les llingües romániques. El so continuador n’asturianu tien la forma «-zón» y alcuéntrase en dalgunes pallabres heredaes y creaciones idiorromániques. L’usu de la voz «dalgunes» podría sorprender equí, pero resulta qu’esti sufixu, mui prolíficu n’estaos llingüísticos anteriores, foi bien poco productivu a lo llargo de la historia de la llingua asturiana. Gracies a dellos llibros, pue constituise un corpus de pallabres terminaes pola secuencia gráfica y estos lexemes puen llueu clasificase en diverses categoríes según el tipu llingüísticu al que perteneza caún y según la so relevancia pa esti estudiu. Esti enfoque permite ellaborar una llista curtia de voces analizables como derivaos en «-zón», llista que sirvirá de base pa l’análisis d’esti morfema dende una perspeutiva semántica, morfolóxica y morfosintáutica. La última parte d’esti estudiu centraráse en desplicar la baxa productividá y l’escasu caltenimientu d’esti sufixu, teniendo en cuenta, ente otros factores, la competencia exercida por otros sufixos asemeyaos formalmente y/o semánticamente.

Pallabres clave

análisis diacrónicu, comparanza románica, protorromance, sufixación

Artículu en pdf Compartir