La conciencia d’una variable sociollingüística y el comportamientu llingüísticu tán intrinsecamente coneutaos, de mou que’l segundu puede influyir nel usu de ciertes variedaes llingüístiques per parte del falante. D’esta miente, l’estudiu de la conciencia y la prominencia como parte de la variación llingüística ye crucial pa entender na so totalidá les escoyetes llingüístiques que los falantes faen na interaición y el significáu social de les variantes qu’ellos empleguen. Nesti artículu, investigo cómo los patrones na producción y perceición de rasgos asturianos podríen esplicase per aciu de la investigación de la so prominencia cognitiva y social, según los distintos niveles de conciencia sociollingüística observaos nes comunidaes nes que l’asturianu y el castellanu tán en contautu. Tres d’un análisis del discursu metallingüísticu nes redes sociales, l’artículu esplora l’efeutu de la prominencia cognitiva y la conciencia esplícita de los morfemes de xéneru asturianos /-u/ y /-es/ y cómo se rellaciona la disponibilidá de la forma asturiana «ye» pa indexar actitúes interaicionales cola conciencia del falante sobre esta variante sociollingüística, el so simbolismu y el control que tien sobre’l so usu. Vemos asina que los distintos niveles de prominencia y conciencia afeuten a los distintos campos indiciales d’estes variantes por contautu, faciendo asina que dellos rasgos se vuelvan indicadores d’identidá asturiana y de posición social, qu’adopten estilos concretos y que s’utilicen como unidaes indicadores d’actitú basaes nes necesidaes sociales del interllocutor.
Sociollingüística, llingua asturiana, conciencia, prominencia.