Análisis pragmáticu de la unidá fraseolóxica ¡calla ho!

Llucía Menéndez Díaz

Resume

Delles estayes de la llingua nun algamen una caracterización completa hasta que s’analicen al traviés de la perspectiva pragmática: la fraseoloxía ye un exemplu d’ello. Ye por esto que decidimos facer un análisis fraseopragmáticu de la espresión idiomática ¡calla ho! Nun primer momentu, atendemos pa la espresión en tanto qu’unidá fraseolóxica, esto ye, como segmentu dafechu institucionalizáu que presenta fixación morfolóxica y especialización semántica. Darréu, analizamos los elementos que la componen y el significáu individual de caún d’ellos col fin d’albidrar la motivación que remanez de la xuntura de los dos elementos y el significáu treslaticiu que se deriva d’ello. A lo cabero, desendolcamos l’análisis pragmáticu teniendo en cuenta los contestos d’usu pente medies de la teoría de los actos de fala d’Austin, esto ye, según el casu constituirá un actu exercitativu o un actu comportativu.

Pa ello, emplegamos amueses de fala espontánea que dan cuenta de los contestos nos que se pue atopar tala unidá fraseolóxica, col oxetivu d’apurrir una descripción de los diferentes usos y valores comunicativos que presenta. Estes tómense de conversaciones de WhatsApp, yá qu’esta mena de canales de comunicación, lo mesmo qu’otros chats, caracterícense pola inmediatez comunicativa, independientemente del tiempu que trescurra ente la emisión y la recepción del mensax, a diferencia d’otros medios qu’a priori puean paecer asemeyaos, como’l corréu electrónicu, canal que funciona como’l mediu escritu tradicional.

Pallabres clave

fraseopragmática, fraseoloxía asturiana, WhatsApp, actos de fala.

Artículu en pdf Compartir