Esti artículu estudia Como aquella que yeres, el poemariu col que Lourdes Álvarez ganó’l Premiu «Teodoro Cuesta» en 1994 pero que nun s’asoleyaría hasta 2005, dende la perspeutiva de la que da anuncia’l títulu. Acordies con ello, pescuda nel perfil del suxetu poéticu, que l’autora define como «dafechamente femenín», naguando por comprender qué carauterístiques –temátiques, téuniques y d’estilu– atopamos dientro’l testu que concreten esti calter. Con esti envís, esplórase en primer llugar el marcu de receición de la obra y les sos posibles tensiones col discursu d’identidá de xéneru que dominaba naquel entós pa, dende ehí, col encontu de dellos conceutos claves na teoría ecofeminista, proponer una llectura alternativa que proyeute un nuevu sentíu sobro dos de los elementos que, dende esta perspeutiva, vuélvense testualmente sustanciales: el cuerpu y la naturaleza.
Lourdes Álvarez; Como aquella que yeres; identidá de xéneru; ecofeminismu