L’oxetivu d’esti testu ye presentar un averamientu más o menos cronolóxicu al Nuevu Cine Asturianu, dende’l so orixe col arranque del sieglu hasta l’actualidá, al traviés de los sos títulos (y cineastes) más representativos, col aquel d’intentar definir les sos característiques principales, tanto formales como temátiques.
Col arranque’l mileniu nuevu, el críticu cinematográficu José Havel publicaba un borrador de manifiestu fundacional de lo que podría ser el «Nuevu Cine Asturianu» que reivindicaba la posibilidá d’un cine «específicamente asturianu», esto ye: el desarrollu d’una mirada cinematográfica que fuera capaz de xenerar una «visión en verdá autóctona de la realidá, afirmando y significando la nuestra identidá sociocultural». El críticu carbayón pidía pola «fisonomización cinematográfica de la identidá asturiana, pola configuración d’una personalidá fílmica intresferible atenta a frañir tópicos, señalar problemes y formular dramáticamente los conflictos d’Asturies». ¿Qué pasó venti años dempués con esi cine asturianu que s’apuntaba como posible n’aquel manifiestu improbable? A esta entruga quier dase rempuesta nes páxines que vienen darréu. Pa conseguilo voi intentar contestar munches otres preguntes: ¿podemos falar anguaño d’esi Nuevu Cine Asturianu? ¿Dende cuándo? ¿Qué característiques lu definen? ¿Qué papel xuega la llingua asturiana nel so desarrollu? ¿Cómo inflúi la hexemonía de la imaxe dixital nel cine nuestru? ¿Por qué los diferentes llinguaxes de la non ficción cinematográfica –ente lo narrativo, lo observacional, lo etnográfico, lo ensayístico, lo autobiográfico o lo esperimental– tan amosándose nos últimos tiempos como los únicos posibles pa esti cine? ¿Qué cineastes lu representen? ¿Qué películes destaquen?
Énte la importancia que sigue teniendo’l cine nos procesos de construcción de la memoria colectiva y de la identidá –siendo memoria y identidá dos conceptos indisolubles si de lo que queremos falar ye de la construcción simbólica d’una nación– la rempuesta a toes eses cuestiones asitia’l tema nun espaciu central pal presente y el futuru del país.
Nuevu Cine Asturianu, cine dixital, cine políticu, identidá, memoria, autoproducción, clas