Contribución de la toponimia al debate sobre el origen romano de Uviéu

Cristina García-Sampedro Clérigo

Resume

Les ayalgues arqueolóxiques alcontraes mui recién nuna escavación científica en plenu cascu históricu de la ciudá d’Uviéu volvieron a abrir un discutiniu que, de magar munchos años, vien tratando de determinar l’aniciu históricu de la ciudá. Un discutiniu que paecía solventiáu cola prevalencia de los qu’afitaben un orixe medieval pa la capital del Principáu, anque nunca faltaron voces que referíen datos concretos, ayalgues arqueolóxiques, detalles filolóxicos y reseñes históriques que podíen contradicir eses teoríes. Toles hipótesis quedaron en suspensu al sabese de l’apaición de los restos d’una fonte de fechura y datación romanes na escavación. Esos restos poníen clara la esistencia d’una construcción que dexaba albidrar la importancia del llugar en dómina romana y veníen a confirmar lo que paecía ser la esistencia d’un Uviéu anterior al medieval. Anque ye claro que mentanto nun se conozan los resultaos científicos de les escavaciones poco se pue añadir, preséntense sicasí nesti artículu delles consideraciones al respeutive, teniendo en cuenta d’una parte los demás restos romanos alcontraos nos alredores d’Uviéu y analizando d’otra una riestra de topónimos del conceyu, onde una granible llista d’antropónimos dexen presuponer una ocupación xenerada pola presencia de villae rellacionaes col nuevu carís que va garrando l’aprovechamientu de la tierra y la so esplotación darréu de la conquista romana, momentu a partir del que varien les pautes del sistema de presura de les tierres.

Pallabres clave

Uviéu, oríxenes, dómina romana, dómina medieval, toponimia, antroponimia.

Artículu en pdf Compartir