Un saltu de paradigma esixe delles respuestes nueves. La sociedá posmoderna del consumu muévese con inseguridá nuna realidá cambiante, caótica y cada vuelta más rizomática. Búscase l’abellugu d’un bienestar inmediatu pero efímeru, que nunca enllena dafechu. Per otru llau, resulten inda más evidentes la heteroxeineidá cultural del mundu d’agora y les preocupaciones identitaries, motivu pol que recuperen la voz nestos momentos los discursos minorizaos. L’oxetu d’esti trabayu ye plantegar una reflexón teórica, dende’l puntu de vista de la socioloxía del llinguaxe. Propónse asina un analís de la concepción de dos realidaes tan «sólides» como son los procesos de normativización y normalización del asturianu y del gallegoasturianu, dientro d’un marcu de rizoma propiu de la «modernidá líquida» de Bauman. En plenu procesu de normalización social d’estes llingües, tórnase imprescindible deprender a convivir colos esquemes de vida posmoderna y entendelos bien, pa poder trabayar en conxuntu na proyección d’un llabor de normalización granible. Ufiértense, a esti respectu, delles estratexes inspiraes nos modelos rellacionales de desing thinking −propios del marketing one to one− y de les esperiencies de pensamientu «lean», col envís d’estrechar el contactu coles respectives comunidaes de falantes, pa qu’estes sientan les sos llingües afayadices, entiendan la situación actual de diglosia y contribuyan a desaniciala cola so llealtá llingüística.
llingua asturiana, gallegoasturianu, procesu de normalización, rizoma, modernidá líquida