Esti artículu tien el so orixe nel proyeutu PatRom, proyeutu panrománicu d’investigación antroponímica. Preséntase nél l’estudiu y la clasificación de los sobrenomes recoyíos na villa asturiana de La Pola (Siero) y vien a xuntase a dellos , yá fechos o por facer, que recueyen los nomatos de les villes asturianes. Estúdiense equí toles formes d’identificación de les persones que son diferentes del nome de pila oficial y la so clasificación fairáse siguiendo los criterios del mencionáu proyeutu panrománicu d’investigación antroponímica; esto ye, analícense y clasifíquense los sobrenomes recoyíos en tres grandes bloques: detoponímicos, antroponímicos y delexicales. L’estudiu faise atendiendo fundamentalmente a la so estructura sintáctica anque, cuando se xulga necesario, inclúyense tamién otros tipos de comentarios; la motivación del sobrenome desconozse davezu y esa ye la razón de la so poca presencia nos conteníos del trabayu (anque delles veces esa motivación sía perimportante pa clasificar el sobrenome correutamente). Nel apartáu de sobrenomes detoponímicos atópense aquellos tomaos del llugar de procedencia, tanto los formaos pol nome del llugar como los orixinaos pol xentiliciu. En segundu llugar analícense los sobrenomes antroponímicos, esto ye, aquellos que rellacionen al portador del sobrenome con dalgún familiar, xeneralmente un pariente cercanu. Nel tercer apartáu asítiense los sobrenomes delexicales, los que tienen el so aniciu nun términu del léxicu y que son los que propiamente llamamos nomatos. Estos sobrenomes tienen un calter descriptivu frente a un calter asociativu qu’amosaríen los otros dos tipos (detoponímicos y antroponímicos). Anque tamién s’atiende pa la estructura, estos delexicales subagrúpense per campos semánticos: profesiones, carauterístiques físiques/psíquiques, animales... Apaez un último grupu formáu por sobrenomes familiares, mui frecuentes en La Pola. Finaliza l’artículu col llistáu de tolos sobrenomes recoyíos na villa polesa.
Llingua asturiana, Onomástica, sobrenomes, La Pola (Siero), Asturies