El teatru de la Ilustración como ún de los principios básicos de l’actividá escénica n’Asturies

Antón Caamaño Vega

Resume

Xunto al denomáu etnodrama o teatru ritual, el teatru que se desendolca a partir de les propuestes de la élite ilustrada n’Asturies, que se concreta nuna formalización temática, estilística y llingüística del xéneru dramáticu, pue considerase ún de los pegollos principales onde s’afita’l sistema teatral asturianu d’anguaño. El teatru foi tratáu polos ilustraos como un preséu necesariu pa la educación y la meyora de la sociedá. El primer dramaturgu conocíu qu’escribe en llingua asturiana, «Antón de Marirreguera» funciona como engarce ente’l teatru ritual y l’ilustráu. Pela so parte, Gaspar Melchor de Xovellanos sedrá, como autor y como políticu, figura fundamental de tou esti capítulu y, amás, contribuirá a la configuración de la nomada «Xeneración del Mediu Sieglu». Ello constitúi un xiru lliterariu y social perimportante, un tránsitu dende los preceutos ilustraos hasta una perspeutiva más rexonalista y prerromántica, qu’atopa na poesía, nes formes dramátiques y na llingua asturiana preseos valibles pa ellaborar una forma  d’espresión diferenciada. D’estamiente, soxéneros teatrales como’l monólogu asturianu o la comedia tradicional  podríen tener el so aniciu nel llabor d’esti grupu d’autores; per otra parte, esti procesu y los sos protagonistes tamién inspiraron propuestes dramátiques en cuantes a teatru históricu, traxedies o, más recién, teatru contemporáneu.

Pallabres clave

Etnodrama, teatru ritual, teatru de la Ilustración, Xovellanos

Artículu en pdf Compartir