El presente artículu tien el so aniciu na comunicación fecha nes XXXV Xornaes Internacionales d’Estudiu de l’Academia de la Llingua Asturiana celebraes n’Uviéu en payares de 2016 y ye por ello que tuvo una xénesis dafechamente oral. Tenta de facer un percorríu y amañar un catálogu descriptivu de los personaxes o «tipos» femeninos qu’apaecen nos cuentos tradicionales asturianos, reparando nos modelos que más se repiten y nes característiques físiques y psicolóxiques que s’axudiquen a estos personaxes. Partiendo de que la lliteratura tradicional ye universal y de que yá se conoz d’antemano que nun se van topar diferencies «esclusives» pa les muyeres asturianes, sí se reconoz ente elles l’ambiente asturianu, sobre manera en tolo que cinca a la estaya antropolóxica: llingua, trabayos, ritos de pasu, alimentación, etc. Estremando primero cuentos maraviyosos de cuentos humorísticos, hai básicamente dos modelos de muyer: la protagonista de los relatos máxicos, la antiprincesa, ye guapa, honrada y virtuosa y resuelve con muncha habilidá los problemes que se-y planteguen, mientres que les muyeres que protagonicen los cuentos realistes, cuasi siempre humorísticos, tán cargaes d’atributos peyorativos tanto físicos como psíquicos: son infieles, egoístes y mandones, anque les más de les veces, más llistes que los homes. Tolos exemplos tán tomaos de les principales colecciones de cuentos publicaes hasta la fecha n’Asturies, dende’l Folk-lore de Proaza, d’Eugenio de Olavarría y Huarte –firmáu col nomatu de «L.Giner Arivau»– en 1886, pasando depués peles de Cabal, Llano y Canellada hasta llegar a les más modernes, de los primeros años del presente sieglu. Hai, amás, un recuerdu imprescindible pa les muyeres que fueron tresmisores de la lliteratura popular y un sitiu importante pa les muyeres recolectores d’anguaño.
Oralidá, cuentos tradicionales asturianos, los personaxes femeninos