La lleenda medieval d’orixe cultu de «El tributu de les cien doncelles» que sirvió como llevantu escontra dellos reis asturianos, guaña en Samartín del Rei Aurelio y sirve como base a la xente del conceyu pa ellaborar etimoloxíes populares. Desplícase asina, pente medies d’histories, l’orixe de dellos topónimos del conceyu de Samartín del Rei Aurelio (L’Entregu, La Choza, La Varaosa, etc.), lo qu’arriquez la lleenda de la figura d’ún de los reis de la monarquía asturiana, que da nome al conceyu. Esta figura ha revelase clave: sobro ella converxe’l mayor númberu de desplicaciones de les etimoloxíes populares. Fáise un repasu a la figura d’Aurelio según conseñen les fontes históriques, restolando peles cróniques y poniendo porgüeyu nes más de les tesis clave del llevantu escontra’l rei; el trabayu afita les conexones que faen qu’una lleenda culta polarice tou un sistema de creencies populares y sea la causa de l’apaición de munches etimoloxíes populares, pa esplicar a traviés d’esos significaos munchos topónimos del conceyu, baxo la óptica de la figura del citáu monarca. L’artículu conclúi con un inventariu nel que s’ufre’l nome del topónimu, la desplicación filolóxica o científica, y la popular, a la que s’amiesten, nel casu de que seya posible, referencies escrites que s’atoparon, aportando, tamién, les referencies de fonte oral que se sintieren y qu’entá permanecen vives, anque en retrocesu na mentalidá popular de la xente del conceyu.
Reinu asturianu, Rei Aurelio, Tributu de les Cien Doncelles, etimoloxía popular, toponimia