La casa dexada atrás, la primixenia, dende los clásicos grecollatinos, ye unu de los símbolos más universales y recurrentes ente los poetes de toles dómines. La torna al llar abandonáu, a la casa paterna, tamién se convierte ente los autores asturianos nuna de les imáxenes que meyor representa l’añoranza pola felicidá y el paraísu perdíos. Y ye esa morada, símbolu en munches ocasiones de la figura materna, la que nos sirve d’abelugu énte la hostilidá y los reveses del mundu que nos aguarda y nos decepciona. Un locus amoenus, accesible tan solo al traviés de la evocación, que nos avera al tema de les ruines d’identidá y de memoria histórica y al de la naturaleza poderosa y voraz que los autores aprovechen como mou d’introspeición nel mundu personal. Retornar nun ye posible, pero como Odiseo, toos, tarde o aína, volvemos a esa casa primixenia, a esi llugar afayadizu nel que, anque naide nun nos espere, conocimos la felicidá y criámonos dichosos, seique más de lo que somos güei, sirviéndonos tamién como midida del pasu del tiempu y como espeyu onde comparar l’antes col agora, la magnitú del ayeri cola poquedá presente. Dempués d’aquellos años, de xuru idealizaos, toos vivimos nun destierru personal y regresar a la casa paterna pue ser, ensin más, volver a unu mesmu, pos la casa nun representa otra cosa que’l ser interior y toles sos estancies nun son sinón lo que somos nós per dientro. Voz avisadora o conciencia de muerte o d’esraizadura palpita ellí onde ñaz la sienda que lleva a la ciudá na que los poetes vense como desterraos y sienda qu’encamina, bien adulces pero definitivamente, al abandonu de caleyes, puertes, cuarterones y postigos de la infancia.
Tópicu, casa primixenia, retornu, ruines, poesía asturiana