Afitándose na hipótesis de la pertenencia al ámbitu mineru, por etimoloxía y significáu, del sustantivu guah.e (<ing. WASHED ‘que llava con agua’), qu’entamó a rexistrase nos diccionarios asturianos a finales del s. XIX, estúdiase nesti artículu la presencia d’esti términu en testos lliterarios asturianos y castellanos, datándose la so primera apaición en 1899 nun testu escritu en castellán. Anótase igualmente que na lliteratura n’asturianu nun se xeneralizaría hasta los años 70 del s. XX, anque dellos autores mui rellacionaos cola mina, como «León Delestal», César Rubín o «Mánfer de la Llera», yá lu empleguen davezu enantes d’estes feches.
Llingua asturiana, Lliteratura asturiana, Etimoloxía, guah.e